தூத்துக்குடி அருகே விபத்தில் காயமடைந்தவர் சாவு

தூத்துக்குடி அருகே உள்ள எம். சவேரியார்புரம் ராஜீவ் நகர் 2வது தெருவைச்சேர்ந்தவர் வேல்மயில் (வயது 58). கூலித்தொழிலாளி. கடந்த சில நாட்களுக்கு முன்பு எம். சவேரியார்புரம் பகுதியில் தூத்துக்குடி- திருச்செந்தூர் சாலையை கடந்து செல்ல முயன்றார். அப்போது தூத்துக்குடி நோக்கி வேகமாக வந்த மோட்டார் சைக்கிள் வேல்மயில் மீது மோதியதாக கூறப்படுகிறது. இதில் பலத்த காயம் அடைந்த அவரை அக்கம் பக்கத்தினர் மீட்டு சிகிச்சைக்காக தூத்துக்குடி அரசு ஆஸ்பத்திரியில் சேர்த்தனர். அங்கு தீவிர சிகிச்சையில் இருந்த அவர், நேற்று சிகிச்சை பலனின்றி பரிதாபமாக இறந்தார். இதுகுறித்த புகாரின் பேரில் முத்தையாபுரம் போலீசார் வழக்குப்பதிவு செய்து விசாரணை நடத்தி வருகின்றனர்.