வடமதுரை அருகே தனியார் தோட்டத்தில் இறந்து கிடந்த காட்டெருமை

வடமதுரை :

வடமதுரை அருகே உள்ள சுக்காம்பட்டி ஊராட்சிக்கு உட்பட்ட அயனாம்பட்டி பகுதியில் வனத்துறையினர் நேற்று ரோந்து சென்றனர். அப்போது தொப்பசாமிமலை அருகே உள்ள தனியாருக்கு சொந்தமான தோட்டத்தில் காட்டெருமை ஒன்று இறந்து கிடப்பதை வனத்துறையினர் பார்த்தனர்.

 உடனே அய்யலூர் அரசு கால்நடை மருத்துவமனைக்கு அவர்கள் தகவல் கொடுத்தனர். இதையடுத்து கால்நடை டாக்டர் ராஜ்குமார் மற்றும் மருத்துவ குழுவினர் சம்பவ இடத்துக்கு வந்து காட்டெருமையின் உடலை பரிசோதனை செய்தனர். பின்னர் அங்குள்ள வனப்பகுதியில் காட்டெருமையின் உடல் புதைக்கப்பட்டது. இதுகுறித்து அய்யலூர் வனச்சரக அலுவலர் குமரேசன் கூறுகையில், இறந்தது 6 வயதுடைய ஆண் காட்டெருமை ஆகும். உடல்நலம் பாதிக்கப்பட்டு அது இறந்திருக்கலாம் என்றார்.