ரூ.4¾ கோடிக்கு செல்லாத ஆயிரம் ரூபாய் நோட்டுகள் பறிமுதல்

காளையார்கோவில்,

 செங்கல்பட்டு பகுதியை சேர்ந்தவர் சுரேஷ்குமார். இவரது மனைவி வரலட்சுமி (வயது 45).இவர் தனியார் தொண்டு நிறுவனம் நடத்தி வருகிறார். இவரிடம் பழைய செல்லாத 1000 ரூபாய் நோட்டுகள் கட்டுக்கட்டாக இருந்தன.
அவர்கள் நேற்று மாலை சிவகங்கை மாவட்டம், காளையார்கோவில் அருகே வளையம்பட்டி கிராமத்தில் உள்ள அருள் சின்னப்பன் வீட்டிற்கு வந்தனர்.
அங்கு செல்லாத ரூபாய் நோட்டுகளை அருள்சின்னப்பனிடம் கொடுத்தனர். இதற்கிடையே இது பற்றிய ரகசிய தகவல் அறிந்து அங்கு விரைந்து வந்த காளையார்கோவில் போலீசார் அருள்சின்னப்பன் வீட்டை சுற்றி வளைத்து அவர்களை பிடித்தனர்.
உடனடியாக வரலட்சுமி, அவரது தம்பி அசோக்குமார், அருள்சின்னப்பன் ஆகிய 3 பேரையும் காளையார்கோவில் போலீஸ் நிலையத்திற்கு கொண்டு சென்றனர். அங்கு அவர்களிடம் தீவிர விசாரணை நடத்தினார்கள்.
இது குறித்து தகவல் அறிந்ததும் மாவட்ட போலீஸ் சூப்பிரண்டு ராஜராஜன்,  துணை போலீஸ் சூப்பிரண்டு பால்பாண்டி ஆகியோரும் வந்து விசாரணை நடத்தினார்கள். பின்னர் அவர்கள் 3 பேரும் கைது செய்யப்பட்டனர். கைதானவர்களில் அருள்சின்னப்பன் பிசியோதெரபி டாக்டர் என்பது தெரியவந்துள்ளது.
இது குறித்து போலீஸ் சூப்பிரண்டு ராஜராஜன் கூறும் போது, “அருள்சின்னப்பன் இது போல செல்லாத ரூபாய் நோட்டுகளை வேறு யாருக்கும் மாற்றி கொடுத்து இருக்கிறாரா? என விசாரித்து வருகிறோம்” என்றார்.
இந்த சம்பவம் அந்த பகுதியில் பரபரப்பை ஏற்படுத்தியது.