குடிபோதையில் தவறி விழுந்த ஆட்டோ டிரைவர் பலி
குடிபோதையில் தவறி விழுந்த ஆட்டோ டிரைவர் பலி.
கோத்தகிரி,
நீலகிரி மாவட்டம் கோத்தகிரியில் உள்ள காம்பாய்க்கடை அருகே சேட்லைன் பகுதியை சேர்ந்தவர் பிரேம்குமார்(வயது 45). ஆட்டோ டிரைவர். இவருக்கு திருமணமாகி மனைவி மற்றும் 2 குழந்தைகள் உள்ளனர்.
இந்த நிலையில் பிரேம்குமார் நேற்று முன்தினம் இரவு 10 மணியளவில் ராம்சந்த் சதுக்கம் சாலையில் உள்ள ஒன்றிய மகளிர் வணிக வளாக கட்டிடத்தின் மாடியில் அமர்ந்து மது குடித்தார். பின்னர் அவர் குடிபோதையில் அங்கிருந்து தவறி கீழே விழுந்தார். இதில் பலத்த காயம் அடைந்த அவர் சம்பவ இடத்திலேயே பரிதாபமாக உயிரிழந்தார்.
இதையடுத்து நேற்று காலை அந்த வழியாக சென்றவர்கள் பிரேம்குமார் உயிரிழந்து கிடப்பதை கண்டு கோத்தகிரி போலீசாருக்கு தகவல் கொடுத்தனர். அதன்பேரில் விரைந்து வந்த போலீசார் அவரது உடலை மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். மேலும் சம்பவம் குறித்து வழக்குப்பதிவு செய்து, விசாரணை நடத்தி வருகின்றனர்.