பர்கூர் மலைப்பகுதியில் முயல் வேட்டையாட முயன்ற விவசாயிக்கு ரூ.20 ஆயிரம் அபராதம்

அந்தியூர்

அந்தியூர் அடுத்த பர்கூர் மலைப்பகுதி ஜீயன் என்ற இடத்தில் பர்கூர் வனச்சரகர் மணிகண்டன், வனவர் ரூபன் மற்றும் வனத்துறையினர் ரோந்து பணியில் ஈடுபட்டனர். அப்போது அந்த வழியாக வந்த ஒருவர், வனத்துறையினரை பார்த்ததும் அங்கிருந்து ஓடினார். இதனால் வனத்துறையினர் அவரை துரத்தி சென்று பிடித்தனர்.

விசாரணையில் அவர் பர்கூர் மலைப்பகுதி பெரியூர் பகுதியைச் சேர்ந்த மாரசாமி (வயது 45) என்பதும், விவசாயியான இவர் அந்த பகுதியில் முயல் வேட்டையாட முயன்றதும் தெரியவந்தது. இதைத்தொடர்ந்து அவர் வேட்டையாட வைத்திருந்த சுருக்கு கம்பி பறிமுதல் செய்யப்பட்டது. மேலும் அவருக்கு மாவட்ட வன அதிகாரி விஸ்மிஜூ விஸ்வநாதன் உத்தரவின் பேரில் ரூ.20 ஆயிரம் அபராதம் விதிக்கப்பட்டது.