இளம்பிள்ளை அருகே விவசாய நிலத்தில் முதியவர் பிணம் யார் அவர்? போலீசார் விசாரணை

இளம்பிள்ளை,

இளம்பிள்ளை அருகே நடுவனேரி ஏரிக்கு அருகே உள்ள ஒருவரது விவசாய நிலத்தில் அடையாளம் தெரியாத 65 வயது மதிக்கத்தக்க முதியவர் ஒருவரின் பிணம் கிடந்தது. மூக்கில் ரத்தம் வடிந்த நிலையில் கிடந்த அந்த பிணம் குறித்து தகவல் கிடைத்ததும், மகுடஞ்சாவடி போலீஸ் சப்-இன்ஸ்பெக்டர் பூபதி மற்றும் போலீசார் சம்பவ இடத்துக்கு சென்று அங்கு நின்றவர்களிடம் விசாரணை நடத்தினர். 

அந்த பிணத்தின் இடது கையில் கே.சீரங்கன் என பச்சை குத்தப்பட்டு இருந்தது. மேலும் இறந்த முதியவர், வெள்ளை வேட்டியும், வெள்ளை கட்டம் போட்ட ரோஸ் நிற முழுக்கை சட்டையும் அணிந்திருந்தார். இறந்த முதியவர் யார்? எந்த ஊரைச் சேர்ந்தவர்? என்பது குறித்து போலீஸ் இன்ஸ்பெக்டர் முத்துசாமி, சப்-இன்ஸ்பெக்டர் பூபதி ஆகியோர் வழக்குப்பதிவு செய்து விசாரணை நடத்தி வருகின்றனர். மேலும் அந்த முதியவரின் உடலை மீட்டு சேலம் அரசு ஆஸ்பத்திரிக்கு பிரேத பரிசோதனைக்காக போலீசார் அனுப்பினர்.