கோவை கோனியம்மன் கோவில் தேரோட்டம் இன்று நடக்கிறது
கோவையில் உள்ள கோனியம்மன் கோவில் தேரோட்டம் இன்று (புதன்கிழமை) நடக்கிறது.
கோவை
கோவையில் உள்ள கோனியம்மன் கோவில் தேரோட்டம் இன்று (புதன்கிழமை) நடக்கிறது.
கோனியம்மன் கோவில்
கோவையில் உள்ள கோனியம்மன் கோவில் கோவையின் காவல் தெய்வமாக போற்றப்படுகிறது. இந்த கோவிலில் ஆண்டுதோறும் மாசி மாத தேர்த்திருவிழா வெகுவிமரிசையாக நடப்பது வழக்கம்.
அதன்படி இந்த ஆண்டுக்கான தேர்த்திருவிழா கடந்த மாதம் 16-ந் தேதி பூச்சாட்டுதல் மற்றும் 23-ந் தேதி கொடியேற்றத்துடன் தொடங்கியது. தொடர்ந்து கடந்த 24-ந் தேதி முதல் 1-ந் தேதி வரை கோனியம்மன் பல்வேறு வாகனங்களில் திருவீதி உலா வந்து பக்தர்களுக்கு அருள் பாலித்தார். நேற்று மாலை திருக்கல்யாணம் நடைபெற்றது.
இன்று தேரோட்டம்
விழாவின் சிகர நிகழ்ச்சியான தேரோட்டம் இன்று (புதன்கிழமை) மதியம் 2 மணிக்கு நடக்கிறது. இதில் திரளான பக்தர்கள் கலந்து கொண்டு வடம் பிடித்து தேர் இழுக்கிறார்கள். இந்த தேரானது ராஜவீதி தேர் திடலில் இருந்து புறப்பட்டு ஒப்பணக்கார வீதி, கருப்பக்கவுண்டர் வீதி, வைசியாள் வீதி வழியாக சென்று மீண்டும் தேர்த்திடலை வந்தடைகிறது.
இதையடுத்து நாளை (வியாழக்கிழமை) பரிவேட்டை-குதிரை வாகனம், நிகழ்ச்சியும், நாளை மறுநாள் (வெள்ளிக்கிழமை) தெப்ப திருவிழா, 6-ந் தேதி தீர்த்தவாரி கொடியிறக்கம், 8-ந் தேதி வசந்த விழாவுடன் தேர்த்திருவிழா நிறைவடைகிறது.
விழாவுக்கான ஏற்பாடுகளை கோவில் செயல் அலுவலர் கைலாச மூர்த்தி, உதவி ஆணையர் விஜயலட்சுமி மற்றும் கோவில் பணியாளர்கள் செய்து வருகிறார்கள்.
கோவிலுக்கு மற்றும் தேரோட்டத்துக்கு வரும் பக்தர்கள் கண்டிப்பாக முக கவசம் அணிந்து, சமூக இடைவெளியை கடைப்பிடித்து அம்மனை தரிசித்து செல்ல வேண்டும் என்று அறநிலைத்துறை அதிகாரிகள் தெரிவித்து உள்ளனர்.