9, 10, 11-ம் வகுப்பு படிப்பவர்கள் அனைவரும் தேர்ச்சி அறிவிப்பு குறித்து மாணவ-மாணவிகள், ஆசிரியர்கள் கருத்து

பெரம்பலூர்:

கொரோனா ஊரடங்கு காரணமாக கடந்த ஆண்டு மார்ச் மாதம் முதல் பள்ளிகள் மூடப்பட்டன. ஊரடங்கு தளர்விற்கு பின்னர் இந்த ஆண்டு பொதுத் தேர்வெழுதும் 12 மற்றும் 10-ம் வகுப்பு மாணவர்களுக்கு ஜனவரி மாதத்திலும், 9 மற்றும் 11-ம் வகுப்பு மாணவர்களுக்கு பிப்ரவரி மாதத்திலும் பள்ளிகள் திறக்கப்பட்டன. இந்த நிலையில் நேற்று காலை தமிழக சட்டசபையில் 110 விதியின் கீழ் தமிழகத்தில் 9, 10, 11-ம் வகுப்பு பயிலும் மாணவர்கள் தேர்வின்றி அனைவரும் தேர்ச்சி பெற்றதாக முதல்-அமைச்சர் எடப்பாடி பழனிசாமி அறிவித்தார். இந்த தகவலை நேற்று மதியம் அறிந்த பெரம்பலூர் மற்றும் அரியலூர் மாவட்ட பள்ளிகளில் 9, 10, 11-ம் வகுப்புகளில் படிக்கும் மாணவ-மாணவிகள் மகிழ்ச்சி அடைந்தனர். சில மாணவ-மாணவிகள் உற்சாகத்தில் துள்ளி குதித்து தங்களது மகிழ்ச்சியை வெளிப்படுத்தினர்.

மேலும் இது குறித்து பள்ளி மாணவ, மாணவிகள், ஆசிரியர்கள், பெற்றோர்கள் கருத்து தெரிவித்துள்ளனர். அது பற்றிய விவரம் வருமாறு;-

பெரம்பலூர் மாவட்டத்தில் உள்ள ஒரு தனியார் பள்ளியில் 10-ம் வகுப்பு படிக்கும் மாணவர் ராகேஷ்:-

கொரோனா ஊரடங்கு காரணமாக அரசின் உத்தரவினால் ஏற்கனவே 9-ம் வகுப்பு தேர்வு எழுதாமலேயே தேர்ச்சி அடைந்தேன். தற்போது 10-ம் வகுப்புக்கும் பொதுத் தேர்வின்றி தேர்ச்சி பெற்றதாக அறிவிப்பு வெளியிட்ட முதல்-அமைச்சர் எடப்பாடி பழனிசாமிக்கு மாணவர்கள் சார்பில் நன்றியை தெரிவித்து கொள்கிறோம்.

அரசு பள்ளியில் 10-ம் வகுப்பு படிக்கும் மாணவி அசின்:-

பொதுத்தேர்வின்றி 10-ம் வகுப்பு தேர்ச்சி பெற்றதாக தமிழக அரசின் அறிவிப்பு படிப்பில் சிறந்து விளங்கும் மாணவ-மாணவிகளுக்கு பெரிதும் பாதிப்பை ஏற்படுத்தும். பொதுத் தேர்வு வைக்கப்பட்டிருந்தால் நல்ல மதிப்பெண்களை பெற முடிந்திருக்கும்.

அரசு பள்ளி 9-ம் வகுப்பு மாணவி சகுந்தலா:-

மீண்டும் பள்ளிகள் திறக்கப்பட்டு சில வாரங்களே ஆன நிலையில், இந்த ஆண்டும் தேர்வின்றி தேர்ச்சி பெற்றதாக அறிவித்த அரசின் அறிவிப்பு மாணவ-மாணவிகள் மத்தியில் மகிழ்ச்சியை ஏற்படுத்தினாலும், இந்த அறிவிப்பு நன்றாக பயிலக்கூடிய மாணவ-மாணவிகளுக்கு ஏமாற்றத்தை தந்துள்ளது.

தனியார் பள்ளி 11-ம் வகுப்பு மாணவர் கார்த்திக்ராஜா:-

ஏற்கனவே 10-ம் வகுப்பு பொதுத் தேர்வு எழுதாமலேயே மாணவர்கள் தேர்ச்சி பெற்றதாக அரசு அறிவித்தது. தற்போது 11-ம் வகுப்புக்கும் பொதுத் தேர்வின்றி தேர்ச்சி என்ற அறிவிப்பு மாணவர்கள் மத்தியில் வரவேற்பை பெறலாம். 12-ம் வகுப்பு பொதுத்தேர்வுக்கு தற்போது இருந்தே தயாராக வேண்டும்.

சத்திரமனை அரசு மேல்நிலைப்பள்ளி உதவி தலைமை ஆசிரியரும், தாவரவியல் ஆசிரியருமான காமராஜ்:-

மாணவர்கள் நலன் கருதி 9, 10, 11-ம் வகுப்பு மாணவ-மாணவிகள் தேர்வின்றி தேர்ச்சி பெற்றதாக அறிவித்த தமிழக அரசின் அறிவிப்பு வரவேற்கத்தக்கது. இதனால் மாணவ-மாணவிகள் உற்சாகம் அடையாமல், தொடர்ந்து பொது அறிவினை வளர்த்து கொள்ள வேண்டும். அடுத்த வகுப்பிற்கான பாடங்களை தற்போது இருந்தே படிக்க தொடங்க வேண்டும்.

அரியலூர் மாவட்டம் காரைக்குறிச்சி அரசு மேல்நிலைப்பள்ளியில் 10-ம் வகுப்பு படிக்கும் மாணவி சங்கவி:-

10-ம் வகுப்பு பொதுத்தேர்வு ரத்து செய்யப்பட்டு அனைத்து மாணவ, மாணவிகளும் தேர்ச்சி பெற்றதாக அறிவிக்கப்பட்டுள்ளது. ஆனால் என்னை பொறுத்த அளவில் நான் தேர்வு எழுதவே விரும்பினேன். தேர்வு எழுதி இருந்தால் எங்களது உண்மையான மதிப்பெண் வெளிப்பட்டிருக்கும்.