மடத்துக்குளம்,
மடத்துக்குளம் சுற்றுவட்டார பகுதியில் உள்ள கடத்தூர், கணியூர், சோழமாதேவி, வேடபட்டி, துங்காவி, காரத்தொழுவு, போன்ற பல்வேறு பகுதிகளில் நெற்பயிர் அறுவடை முடிந்து, வைக்கோல் விற்பனை விறுவிறுப்பாக நடைபெற்று வருகிறது. இது குறித்து வைக்கோல் வியாபாரிகள் கூறியதாவது:-
மடத்துக்குளம் பகுதியில் தற்போது அறுவடை செய்யப்பட்ட விவசாய நிலங்களில் எஞ்சியுள்ள வைக்கோல் விற்பனை தொடங்கியுள்ளது. இதனையடுத்து கையால் கட்டப்படும் வைக்கோலானது, 1 ஏக்கர் பரப்பளவில் உள்ள வைக்கோல் ரூ. 4 ஆயிரம் முதல் 5 ஆயிரம் வரை விற்பனை செய்யப்பட்டு வருகிறது. அறுவடை எந்திரத்தால் கட்டப்படும் 3 அடி அளவுள்ள வைக்கோல் கட்டானது ரூ.180 முதல் ரூ.220 வரை விற்பனை செய்யப்பட்டு வருகிறது. இந்த வைக்கோல் 1 ஏக்கருக்கு குறைந்தபட்சம் 30 கட்டுகள் கிடைக்கிறது.
இந்த வைக்கோல் வெளிமாநிலங்களுக்கு அனுப்பி வைக்கப்படுகிறது. அறுவடை முடிந்து அடுத்து வரும் அறுவடை காலங்கள் வரை, சுமார் 5 மாதங்களுக்கு கால்நடைகளுக்கு தேவையான வைக்கோலை, கால்நடை வளர்ப்போர், இப்போதே சேகரித்து வைத்துக்கொள்வது மிகவும் அவசியம்.
இவ்வாறு அவர் கூறினார்.