வருகிற சட்டமன்ற தேர்தலில் அதிக தொகுதிகளில் தி.மு.க. போட்டியிடும் - உதயநிதி ஸ்டாலின் பேச்சு

விடியலை நோக்கி ஸ்டாலினின் குரல் என்ற நிகழ்ச்சியில் பங்கேற்பதற்காக தி.மு.க. இளைஞர் அணி செயலாளர் உதயநிதி ஸ்டாலின் கரூருக்கு வருகை தந்து நேற்று முன்தினம் பல்வேறு நிகழ்ச்சியில் கலந்து கொண்டு சிறப்புரை ஆற்றினார். தொடர்ந்து 2-வது நாளான நேற்று காலை கரூரில் உள்ள ஒரு திருமண மண்டபத்தில் வாக்குச்சாவடி முகவர்கள் கூட்டம் நடைபெற்றது. 

கூட்டத்திற்கு கரூர் மாவட்ட பொறுப்பாளரும், எம்.எல்.ஏ.வுமான வி.செந்தில்பாலாஜி தலைமை தாங்கினார். சிறப்பு விருந்தினராக தி.மு.க. இளைஞர் அணி செயலாளர் உதயநிதி ஸ்டாலின் கலந்து கொண்டு பேசினார். 

அப்போது அவர் பேசியதாவது:-

வருகிற தேர்தலில் தி.மு.க. ஆட்சியில் அமரப்போவது உறுதி. அ.தி.மு.க. ஆட்சி மீதும், அதை ஆட்டிவைக்கும் பா.ஜ.க. மீதும் மக்கள் கோபமாக உள்ளனர். மோடி நம்மீது கோபமாக இருக்கிறார். கடந்த பொங்கலுக்கோ, தீபாவளிக்கோ, கொரோனா உச்சக்கட்டத்தில் இருந்த காலத்திலோ ரூ.2 ஆயிரத்து 500 கொடுக்காத தமிழக அரசு, தற்போது தேர்தலை கருத்தில் கொண்டே பொங்கலுக்கு ரூ.2 ஆயிரத்து 500 வழங்கி உள்ளது.

கரூர் மாவட்டத்தில் 4 சட்டமன்ற தொகுதிகளுக்கு உட்பட்ட வாக்குச்சாவடி முகவர்கள் ஆகிய நீங்கள் இந்த 2 மாதங்கள் மட்டும் இல்லாமல், வாக்குப்பதிவின் போதும் உடன் இருந்து எழுச்சியோடும், அன்போடும், ஆதரவோடும் தேர்தல் பணியை செய்ய வேண்டும். போலி வாக்குப்பதிவு நடைபெறுகிறதா? என்பதை கண்காணிக்க வேண்டும். 4 தொகுதிகளின் வெற்றியும் உங்கள் கையில்தான் உள்ளது. 

அந்த வெற்றியை நீங்கள் உறுதியாக பெற்றுத்தர வேண்டும். தி.மு.க. தலைவர் மு.க.ஸ்டாலினிடம் கேட்டு கரூர் மாவட்டத்திற்கு உட்பட்ட 4 தொகுதிகளையும் தி.மு.க.விற்கே பெற்றுத்தர முயற்சி எடுப்பேன். ஏற்கனவே 10 தொகுதிகள் கூட்டணி கட்சிகளுக்கு ஒதுக்கப்பட்டுவிட்டது. கடந்த சட்டமன்ற தேர்தலில் தி.மு.க. போட்டியிட்ட தொகுதிகளை விட, இந்த சட்டமன்ற தேர்தலில் தி.மு.க. அதிக தொகுதிகளில் போட்டியிடும். 

மக்கள் ஏற்றுக்கொள்ள கூடிய வெற்றி கூட்டணியை அமைத்து, வெற்றி வேட்பாளர்களை மு.க.ஸ்டாலின் அறிவிப்பார். எனவே வெற்றியை தேடி தரவேண்டியது வாக்கு முகவர்களாகிய உங்கள் கடமை. இவ்வாறு அவர் பேசினார்.

முன்னதாக வாக்குச்சாவடி முகவர்கள் கூட்டத்திற்கு வந்த உதயநிதி ஸ்டாலினுக்கு சிறுமி ஒருவர் பூச்செடி கொடுத்து வரவேற்றார்.