சென்னை விமான நிலையத்தில் ரூ.2½ கோடி தங்கம் பறிமுதல்; தனியார் விமான நிறுவன என்ஜினீயர் உள்பட 3 பேர் கைது
துபாயில் இருந்து சென்னைக்கு கடத்தி வரப்பட்ட ரூ.2 கோடியே 47 லட்சத்து 35 ஆயிரம் மதிப்புள்ள 4 கிலோ 800 கிராம் தங்கத்தை பறிமுதல் செய்த சுங்க இலாகா அதிகாரிகள், இது தொடர்பாக தனியார் விமான நிறுவன என்ஜினீயர் உள்பட 3 பேரை கைது செய்தனர்.
துபாய் விமானம்
சென்னை மீனம்பாக்கம் பன்னாட்டு விமான நிலையத்துக்கு துபாயில் இருந்து சிறப்பு விமானம் வந்தது. அதில் வந்த பயணிகளை விமான நிலைய சுங்க இலாகா கமிஷனர் ராஜன் சவுத்ரி தலைமையிலான சுங்க இலாகா அதிகாரிகள் கண்காணித்தனர்.
அந்த விமானத்தில் வந்த பயணி ஒருவர், பாதுகாக்கப்பட்ட பகுதியில் உள்ள கழிவறைக்கு சந்தேகப்படும்படியாக சென்றுவிட்டு சிறிது நேரத்தில் வெளியே வந்தார். அவர் வெளியே வந்ததும், மற்றொரு வாலிபர் கழிவறைக்குள் சென்றுவிட்டு வந்தார்.
கம்ப்யூட்டர் என்ஜினீயர்
இதை கண்ட சுங்க இலாகா அதிகாரிகள், அந்த வாலிபரை தடுத்து நிறுத்தி விசாரித்தனர். அதில் அவர், விமான நிலையத்தில் உள்ள தனியார் விமான நிறுவனத்தில கம்ப்யூட்டர் என்ஜினீயராக பணியாற்றும் நிழல் ரவி (வயது 29) என தெரியவந்தது. அவரை சோதனை செய்தபோது, 2 பொட்டலங்களில் 27 தங்க கட்டிகள் வைத்திருந்ததை கண்டு பிடித்தனர்.
துபாயில் இருந்து அந்த தங்க கட்டிகளை கடத்தி வந்த சென்னையை சேர்ந்த நியாமத்துல்லா ஹாதி (35) என்பவர், சுங்க சோதனை இல்லாமல் கடத்தல் தங்கத்தை விமான நிலையத்துக்கு வெளியே கொண்டு வந்து தரவேண்டும் என்று கூறி கழிவறையில் மறைத்து வைத்துவிட்டு சென்றதாகவும், அதைதான் எடுத்துக்கொண்டு வெளியே செல்ல இருந்ததாகவும் கூறினார்.
இதையடுத்து நிழல் ரவியையும், தங்கத்தை கடத்தி வந்த நியாமத்துல்லா ஹாதியையும் சுங்க இலாகா அதிகாரிகள் கைது செய்தனர். இவர்களிடம் இருந்து ரூ.1 கோடியே 66 லட்சம் மதிப்புள்ள 3 கிலோ 200 கிராம் தங்கத்தை பறிமுதல் செய்தனர்.
ரூ.2½ கோடி தங்கம்
அதேபோல் துபாயில் இருந்து வந்த மற்றொரு விமானத்தில் வந்த அப்துல் நசார் உள்பட 5 பேரை பிடித்து சுங்க இலாகா அதிகாரிகள் விசாரித்தனர். அவர்களது உடைமைகளில் எதுவும் இல்லாததால் தனியறைக்கு அழைத்து சென்று சோதனை செய்தனர்.
அதில் அவர்கள் 5 பேரும் உள்ளாடைக்குள் மறைத்து வைத்து கடத்தி வந்த ரூ.81 லட்சத்து 35 ஆயிரம் மதிப்புள்ள 1 கிலோ 600 கிராம் தங்கத்தை கைப்பற்றினார்கள்.
சென்னை விமான நிலையத்தில் ஒரே நாளில் சுங்க இலாகா அதிகாரிகள் நடத்திய சோதனையில் 6 பேரிடம் இருந்து ரூ.2 கோடியே 47 லட்சத்து 35 ஆயிரம் மதிப்புள்ள 4 கிலோ 800 கிராம் தங்கத்தை பறிமுதல் செய்தனர்.
இதுதொடர்பாக தங்கம் கடத்தலுக்கு உதவிய தனியார் விமான நிறுவன என்ஜினீயர் நிழல் ரவி, தங்கம் கடத்தி வந்த நியாமத்துல்லா ஹாதி, அப்துல் நசார் ஆகிய 3 பேரையும் சுங்க இலாகா அதிகாரிகள் கைது செய்தனர். மற்ற 4 பேரிடமும் விசாரித்து வருகின்றனர்.