190 கிலோ சந்தன மரக்கட்டைகள் கடத்தி வந்த வாலிபர் கைது

புனே,

புனேயில் இருந்து அகமதுநகருக்கு சந்தனமரக்கட்டைகள் கடத்தப்படுவதாக புனே ஊரக போலீசாருக்கு ரகசிய தகவல் கிடைத்தது. இதன்பேரில் சிரூர் தாலுகா சிக்ராப்பூர் மற்றும் புனே ஊரக போலீசார் இணைந்து புனே-அகமதுநகர் நெடுஞ்சாலையில் தீவிர வாகன சோதனையில் ஈடுபட்டனர். 

அப்போது அந்த வழியாக வந்த டெம்போ ஒன்றை போலீசார் வழிமறித்து சோதனை போட்டனர். அப்போது டெம்போவை ஓட்டி வந்தவர் தப்பி ஓட முயன்றார். அவரை போலீசார் மடக்கி பிடித்தனர். பின்னர் டெம்போவில் நடத்திய சோதனையில் 190 கிலோ எடையுள்ள சந்தன மரக்கட்டைகள் இருந்தது தெரியவந்தது. இவற்றின் மதிப்பு ரூ.25 லட்சத்து 82 ஆயிரம் ஆகும்.

இதையடுத்து போலீசார் டெம்போ மற்றும் சந்தன மரக்கட்டைகளை பறிமுதல் செய்தனர். மேலும் டெம்போவை ஓட்டி வந்தவர் அகமதுநகரை சேர்ந்த சூரஜ் கைலாஷ்(வயது24) என்பது தெரியவந்தது. இது குறித்து போலீசார் வழக்கு பதிவு செய்து அவரை கைது செய்து விசாரணை நடத்தி வருகின்றனர்.