காரைக்கால்மேடு கடற்கரையில் ஒதுங்கிய பிளஸ்-2 மாணவி பிணம் - கொலையா? போலீசார் விசாரணை

காரைக்கால், 

காரைக்கால்மேடு மீனவர் கிராமத்தில் உள்ள கடற்கரையில் இளம் பெண்ணின் உடல் நேற்று காலை கரை ஒதுங்கியது. இதைப்பார்த்ததும் அந்த பகுதியை சேர்ந்தவர்கள் அதிர்ச்சி அடைந்தனர். உடனே இதுகுறித்து அவர்கள் தகவல் தெரிவித்ததன்பேரில் காரைக்கால் நகர போலீஸ் இன்ஸ்பெக்டர் தனசேகரன் மற்றும் போலீசார் சம்பவ இடத்திற்கு வந்து பிணத்தை கைபற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

தொடர்ந்து அவர் யார்? என்பது குறித்து விசாரணை நடத்தினர். இதில் அந்த பெண் காரைக்கால்மேடு பகுதியை சேர்ந்த மீனவர் பாலதண்டாயுதம் என்பவரின் மகளான பிளஸ்-2 மாணவி நிவேதா (வயது 17) என்பது தெரியவந்தது. அவர் அணிந்து இருந்த நகைகள் அப்படியே இருந்தன.

எனவே கடற்கரையில் மர்மமான முறையில் நிவேதாவின் உடல் ஒதுங்கியது எப்படி? என்பது குறித்து சந்தேகம் ஏற்பட்டுள்ளது. இதுதொடர்பாக போலீசார் வழக்குப்பதிவு செய்து நிவேதா கொலை செய்யப்பட்டாரா? அல்லது வேறு ஏதாவது காரணத்துக்காக தற்கொலை செய்துகொண்டாரா? என்பது உள்ளிட்ட பல்வேறு கோணத்தில் போலீசார் வழக்குப்பதிவு செய்து விசாரணை நடத்தி வருகிறார்கள்.

பிளஸ்-2 மாணவியின் உடல் கடற்கரையில் ஒதுங்கிய சம்பவம் அப்பகுதியில் பரபரப்பை ஏற்படுத்தி உள்ளது.