விருத்தாசலம் தாசில்தார் கொரோனாவுக்கு பலி

விருத்தாசலம்,

கடலூர் மாவட்டத்தில் கொரோனாவின் பாதிப்பு நாளுக்கு நாள் அதிகரித்து வருகிறது. பொதுமக்கள் மட்டுமின்றி கொரோனா நோய் பரவல் தடுப்பு பணியில் ஈடுபட்டு வரும் அரசு அலுவலர்கள், ஊழியர்கள், சிகிச்சை அளித்து வரும் டாக்டர்கள், செவிலியர்கள், ஊழியர்களும் பாதிப்புக்கு உள்ளாகி மருத்துவமனையில் சிகிச்சை பெற்று வருகிறார்கள். இவர்களில் சிலர் சிகிச்சை பலனின்றி பரிதாபமாக இறந்துள்ளனர்.

இந்த நிலையில் கொரோனாவால் பாதிக்கப்பட்டு சிகிச்சையில் இருந்து வந்த விருத்தாசலம் தாசில்தார் சிகிச்சை பலனின்றி நேற்று இரவு பரிதாபமாக இறந்தார். அதுபற்றிய விவரம் வருமாறு:-

தாசில்தார்

விருத்தாசலம் தாலுகா அலுவலகத்தில் தாசில்தாராக பணிபுரிந்து வந்தவர் கவியரசு(வயது 48). இவருக்கு கடந்த சில நாட்களுக்கு முன்பு கொரோனா அறிகுறி ஏற்பட்டது. இதையடுத்து அவர் பரிசோதனை மேற்கொண்டதில் கடந்த 9-ந்தேதி கொரோனா தொற்று உறுதி ஆனது. தொடர்ந்து கவியரசு சிதம்பரம் ராஜா முத்தையா மருத்துவக்கல்லூரிக்கு சிகிச்சைக்காக அனுப்பி வைக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்து வந்தனர். ஆனால் சிகிச்சை பலனின்றி கவியரசு நேற்று இரவு பரிதாபமாக உயிரிழந்தார். அவருக்கு ஏற்கனவே சர்க்கரை நோய் பாதிப்பு இருந்ததாக கூறப்படுகிறது.

விழுப்புரத்தை சேர்ந்த கவியரசுக்கு மனைவியும், ஒரு மகளும் உள்ளனர். அவர் இறந்த தகவலை அறிந்து குடும்பத்தினர் மற்றும் உறவினர்கள் கதறி அழுதனர்.