திருக்கோவிலூரில் கொரோனா தடுப்பு நடவடிக்கைகளை கலெக்டர் ஆய்வு

திருக்கோவிலூர்,

விழுப்புரம் மாவட்டம் அரகண்டநல்லூரில் கொரோனா தொற்று உறுதிசெய்யப்பட்ட நிலையில் அரகண்டநல்லூர் முற்றிலும் சீல் வைக்கப்பட்டுள்ளது. அதனை தொடர்ந்து அருகில் உள்ள கள்ளக்குறிச்சி மாவட்ட எல்லையான திருக்கோவிலூரிலும் எல்லைகள் மூடப்பட்டுள்ளன. இந்த நிலையில் அரகண்டநல்லூரில் இருந்து காய்கறி, மளிகை மற்றும் இதர சாமான்கள் வாங்க மக்கள் திருக்கோவிலூருக்கு வந்து செல்கின்றனர். அதேபோல் திருக்கோவிலூரில் உள்ள அரசு மருத்துவமனைக்கும் வந்து செல்கின்றனர்.

இந்த நிலையில் திருக்கோவிலூருக்கு வந்த கள்ளக்குறிச்சி மாவட்ட கலெக்டர் கிரண்குராலா கொரோனா தடுப்பு நடவடிக்கைகளை ஆய்வு செய்தார். அப்போது அவர் மாவட்ட எல்லையை மூடி சீல் வைக்கவேண்டும் என்றும் அத்தியாவசிய தேவைக்கான வாகனங்களை மட்டுமே அனுமதிக்கவேண்டும் என்றும் அதிகாரிகளுக்கு உத்தரவிட்டார்.

கீழையூர்

முன்னதாக கீழையூர் பகுதியை பார்வையிட்டார். அப்போது சுகாதாரத்துறையினர் மேற்கொண்டு வரும் பணியை பார்வையிட்டு ஆய்வு செய்தார். கொரோனா தொற்று பாதிக்கப்பட்ட குடும்பத்தினருடன் தொடர்பில் உடையவர்கள் திருக்கோவிலூர் மற்றும் சந்தப்பேட்டை பகுதியில் இருப்பதாக தகவல் கிடைத்துள்ளது. அவ்வாறு யாரேனும் இருந்தால் அந்த நபர்களுக்கும் ரத்த பரிசோதனை செய்யவும் உத்தரவிட்டார்.

இந்த ஆய்வின் போது வருவாய் கோட்டாட்சியர் சாய்வர்த்தினி, தாசில்தார் சிவசங்கரன், வட்டார வளர்ச்சி அலுவலர் ரேச்சல்கலைச்செல்வி, வட்டார மருத்துவ அலுவலர் சுரேஷ், தனிதாசில்தார் அருங்குளவன், செயல் அலுவலர் செல்லப்பிள்ளை மற்றும் அதிகாரிகள் உடன் இருந்தனர்.