கொரோனா தொற்று: மீனாட்சி அம்மன் கோவில் தீயணைப்பு நிலையம் மூடல்

மதுரை, 

மதுரை மாவட்டத்தில் நேற்று முன்தினம் மட்டும் 15 பேருக்கு கொரோனா தொற்று ஏற்பட்டது. சில தினங்களுக்கு முன்பு மீனாட்சி அம்மன் கோவிலில் பணிபுரிந்த பட்டரின் தாயார் கொரோனா தொற்றால் பாதிக்கப்பட்டு உயிரிழந்தார். இதைதொடர்ந்து கோவிலில் பணிபுரிந்த ஊழியர்கள், அலுவலர்கள், பாதுகாப்பு பணியில் இருந்த போலீஸ்காரர்கள், தீயணைப்பு வீரர்கள் மற்றும் கோவில் பட்டர்கள் என 300 பேருக்கு கொரோனா தொற்று பரிசோதனை செய்யப்பட்டது. அதன் முடிவுகள் நேற்று முன்தினம் வெளிவந்தது.

அதில் கோவிலில் பணிபுரியும் எலக்ட்ரீசியன், தற்காலிக ஊழியர் மற்றும் மீனாட்சி அம்மன் கோவில் தீயணைப்பு நிலைய வீரர் ஆகியோருக்கு கொரோனா தொற்று ஏற்பட்டது உறுதி செய்யப்பட்டது. இதை தொடர்ந்து பாதிக்கப்பட்டவர்கள் மற்றும் அவரின் உறவினர்கள் அனைவரையும் மதுரை அரசு ஆஸ்பத்திரியில் அனுமதிக்கப்பட்டு டாக்டர்கள் தீவிர சிகிச்சை அளித்து வருகிறார்கள். மேலும் அவர்கள் குடியிருக்கும் வீடுகள் அமைந்த பகுதியில் அனைத்து தடுப்புகள் அமைத்து தனிமைப்படுத்தப்பட்டன. மேலும் அந்த பகுதி முழுவதும் கிருமிநாசினி தெளிக்கப்பட்டு சுத்தம் செய்யப்பட்டது.

அதே நேரத்தில் தீயணைப்பு வீரர் பணியாற்றிய மதுரை மேல சித்திரை வீதியில் உள்ள மீனாட்சி அம்மன் கோவில் தீயணைப்பு நிலையத்திலும் கிருமி நாசினி தெளிக்கப்பட்டது. பின்னர் அங்கிருந்த தீயணைப்பு வாகனம் பெரியார் பஸ் நிலையம் பகுதிக்கு கொண்டு செல்லப்பட்டது. அதன்பின்னர் அந்த தீயணைப்பு நிலையம் மூடப்பட்டது.

அதுதவிர அவருடன் பணியாற்றிய தீயணைப்பு வீரர்கள் 12 பேருக்கும் மதுரை மாநகராட்சி சுகாதாரத்துறையினரால் கொரோனா பரிசோதனை செய்யப்பட்டது.

அதேபோன்று மதுரை தெற்குவாசல் போலீஸ் நிலைய சப்-இன்ஸ்பெக்டர் மற்றும் தலைமை காவலருக்கு கொரோனா தொற்று உறுதி செய்யப்பட்டது. அதன் முன்னெச்சரிக்கை நடவடிக்கை காரணமாக சப்-இன்ஸ்பெக்டர் பணியாற்றிய தெற்குவாசல் போலீஸ் நிலையம் மூடப்பட்டது. அதை தொடர்ந்து அந்த போலீஸ் நிலையத்திற்கு எதிரே தற்காலிக போலீஸ் நிலையம் நேற்று அமைக்கப்பட்டது. விரைவில் அருகில் உள்ள ஏதாவது கல்யாண மண்டபம், அரசு கட்டிடத்தில் மாற்றப்படும் என்று போலீசார் தெரிவித்தனர்.

மேலும் போலீசாருடன் பணியாற்றிய சக போலீஸ்காரர்கள் என அனைவருக்கும் கொரோனா பரிசோதனை செய்யப்பட்டது. மேலும் அவர்களுடன் நெருங்கிய உறவில் இருந்த போலீஸ்காரர்கள் 40 பேரை வீட்டிலேயே தனிமைப்படுத்தி கொள்ளுமாறு தெரிவிக்கப்பட்டுள்ளது.

இவ்வாறு மதுரை மாவட்டத்தில் கடந்த 4 நாட்களில் போலீசார் இருவருக்கும், தீயணைப்பு வீரர் ஒருவர், 3 ஒப்பந்த சுகாதார பணியாளர்கள், ஒரு அரசு மருத்துவமனை செவிலியர் என தடுப்பு பணிகளில் ஈடுபட்டோருக்கும் கொரோனா தொற்று உறுதியாகியுள்ளது.

இதன் மூலம் மதுரையில் கொரோனா சமூக தொற்றுக்கான நிலைக்கு சென்று விட்டதாக கருதி பொதுமக்கள் அச்சத்தில் இருக்கின்றனர்.