திருவலம் அருகே, 3 பேரை கொன்று புதைத்த வழக்கில் கொலையாளிகள் 5 பேரை பிடிக்க போலீசார் தீவிர தேடுதல் வேட்டை

திருவலம்,

சிப்காட் போலீஸ் நிலைய எல்லைக்குட்பட்ட பகுதியில் கடந்த மார்ச் மாதம் ஒரு பெண்ணிடம் சீக்கராஜபுரம் மோட்டூரைச் சேர்ந்த யுவராஜ் (வயது 26), திருவலம் பகுதியைச் சேர்ந்த அரவிந்தன் (20), சீக்கராஜபுரம் பல்லவர் நகரைச் சேர்ந்த வாசு (20) ஆகிய 3 பேர் சங்கிலியை பறித்ததாக கைது செய்யப்பட்டனர்.

இந்த 3 பேரும் தனது கூட்டாளிகளான ஜெயபிரகாஷ், இளா என்கிற இளங்கோவன், சதீஷ், சூர்யா, சாரு ஆகிய 5 பேருடன் சேர்ந்து திருட்டு தொழில் போட்டியால் சென்னை போரூர் பகுதியைச் சேர்ந்த ஆசிப் அகமது (26), திருக்கோவிலூர் தாலுகா தெளி பகுதியைச் சேர்ந்த நவீன் குமார் (25), அதே பகுதியைச் சேர்ந்த சூர்யா (19) ஆகிய 3 பேரை கடந்த ஆண்டு ஜூன் மாதம் கொலை செய்து திருவலம் அருகே கம்பராஜபுரம் பனந்தோப்பில் புதைத்ததாக கூறினர்.

யுவராஜ், அரவிந்தன், வாசு ஆகிய 3 பேரை நீதிமன்ற காவலில் எடுத்து விசாரணை நடத்த திருவலம் போலீசார் முடிவு செய்துள்ளனர். 3 பேரை கொன்று புதைத்த வழக்கில் கொலையாளிகள் 5 பேரை பிடிக்க போலீசார் தீவிர தேடுதல் வேட்டையில் ஈடுபட்டுள்ளனர். 5 பேரை பிடித்து விசாரித்தால் தான் கொலைக்காக காரணம் தெரிய வரும். புதைக்கப்பட்ட 3 பேரின் பிணங்களை தோண்டி எடுத்து, பிரேதப் பரிசோதனை செய்தால் தான் உண்மையான தகவல்கள் வெளிவரும், என திருவலம் போலீசார் தெரிவித்தனர்.