அரவக்குறிச்சி அருகே கிணற்றில் விழுந்த தொழிலாளி சாவு ஆட்டை காப்பாற்ற முயன்றபோது பரிதாபம்

அரவக்குறிச்சி, 

அரவக்குறிச்சி அருகே ஆட்டை காப்பாற்ற முயன்ற தொழிலாளி கிணற்றில் தவறி விழுந்து பரிதாபமாக இறந்தார்.

தொழிலாளி சாவு

கரூர் மாவட்டம், அரவக்குறிச்சி அருகே உள்ள கணவாய் கிராமத்தை சேர்ந்தவர் துரைசாமி (வயது 43). தொழிலாளி. இவர் நேற்று தனது வீட்டில் உள்ள ஆடுகளை மேய்ச்சலுக்காக கணவாய் பகுதியில் உள்ள காட்டுப்பகுதிக்கு அழைத்து சென்று மேய்த்து கொண்டிருந்தார். அப்போது அதே பகுதியில் கோப்பாயி என்ற பெண் தனது ஆடுகளை மேய்த்து கொண்டிருந்தார்.

அப்போது கோப்பாயிக்கு சொந்தமான ஆடு ஒன்று அங்கிருந்த கிணற்றில் தவறி விழுந்தது. இதைக்கண்ட துரைசாமி ஆட்டை காப்பாற்றுவதற்காக கிணற்றில் கயிறு கட்டி உள்ளே இறங்கினார். அப்போது எதிர்பாராத விதமாக கயிறு அறுந்து, துரைசாமி கிணற்றின் உள்ளே விழுந்து பரிதாபமாக இறந்தார்.

போலீசார் விசாரணை

இதைக்கண்ட அங்கிருந்தவர்கள் உடனடியாக திண்டுக்கல் மாவட்டம், வேடசந்தூர் தீயணைப்பு நிலையத்திற்கு தகவல் தெரிவித்தனர். அதன்பேரில் தீயணைப்பு படைவீரர்கள் சம்பவ இடத்திற்கு வந்தனர். பின்னர் கயிறு மூலம் கிணற்றில் இறங்கி முதலில், ஆட்டை உயிருடன் மீட்டனர். பின்னர் துரைசாமியின் உடலை கைப்பற்றி பிரேத பரிசோதனைக்காக அரவக்குறிச்சி அரசு மருத்துவமனைக்கு அனுப்பி வைத்தனர்.

இந்த சம்பவம் குறித்து அரவக்குறிச்சி போலீசார் வழக்குப்பதிவு செய்து விசாரணை நடத்தி வருகின்றனர். ஆட்டை காப்பாற்ற முயன்ற தொழிலாளி கிணற்றில் தவறி விழுந்து இறந்த சம்பவம் அப்பகுதியில் சோகத்தை ஏற்படுத்தி உள்ளது.