வீட்டில் அடைத்து வைத்து 15 வயது சிறுமி கூட்டு பாலியல் பலாத்காரம் சென்னையில் 3 பேர் கைது

சென்னை,

விழுப்புரத்தைச் சேர்ந்த 15 வயது சிறுமி தனது தாயாரால் தனித்து விடப்பட்டாள். அந்த சிறுமி சென்னை அடையாறு இந்திராநகரில் உள்ள உறவினர் வீட்டில் வசித்து வந்தாள். அந்த வீட்டுக்கு குடிநீர் கேன் போடுவதற்காக வந்த சதீஷ்குமார் (வயது 24) என்ற வாலிபரோடு அந்த சிறுமிக்கு பழக்கம் ஏற்பட்டதாக தெரிகிறது.

வாலிபர் சதீஷ்குமார், அந்த சிறுமியை திருமண ஆசைகாட்டி வீட்டை விட்டு அழைத்து சென்று விட்டார். முதலில் சதீஷ்குமார் சென்னை நீலாங்கரையில் உள்ள ஒரு வீட்டில் சிறுமியை அடைத்து வைத்து பாலியல் பலாத்காரம் செய்துள்ளார்.

பின்னர், தனது நண்பர்கள் வினோத் (23), ராஜா(29) ஆகியோருடன் சேர்ந்து சதீஷ்குமார் அந்த சிறுமியை கூட்டாக பாலியல் பலாத்காரம் செய்ததாக கூறப்படுகிறது.

சுமார் 2 வார காலம் அந்த சிறுமி 3 பேரால் தொடர்ந்து பாலியல் பலாத்காரம் செய்யப்பட்டுள்ளார். இதற்கிடையே அந்த சிறுமியின் உறவினர் சிறுமி காணாமல் போய்விட்டதாக அடையாறு அனைத்து மகளிர் போலீஸ் நிலையத்தில் புகார் கொடுத்தார்.

இதுதொடர்பாக போலீசார் வழக்குப்பதிவு செய்து சிறுமியை தேடி வந்தனர். இந்தநிலையில் ஆட்டோ டிரைவர் ஒருவர் மூலமாக குறிப்பிட்ட சிறுமி நீலாங்கரையில் உள்ள ஒரு வீட்டில் அடைத்து வைக்கப்பட்டிருப்பது போலீசாருக்கு தெரியவந்தது. போலீசார் நேற்று முன்தினம் இரவு பாலியல் பலாத்காரம் செய்யப்பட்ட சிறுமியை பத்திரமாக மீட்டனர்.

சிறுமியை பாலியல் பலாத்காரம் செய்ததாக போக்சோ சட்டப்பிரிவின் கீழ் சதீஷ்குமார், அவரது நண்பர்கள் வினோத், ராஜா ஆகிய 3 பேரும் கைது செய்யப்பட்டனர்.