வண்டலூர் பூங்காவில் நீலமான், ஓநாய் குட்டிகளை ஈன்றன

வண்டலூர், 

செங்கல்பட்டு மாவட்டம் வண்டலூர் பூங்கா சிறந்ததொரு வனஉயிரின இனப்பெருக்க மையமாக திகழ்கிறது. நிர்வாகத்தின் நல்ல வழி முறைகள் மற்றும் சத்தான உணவுகள் அளிப்பதனால் பூங்காவில் விலங்குகளின் எண்ணிக்கை அதிகரித்துள்ளது.

பூங்காவில் உள்ள இந்திய காட்டு மாடு ராகுல் மற்றும் ரீமா என்ற இணைக்கு சமீபத்தில் ஒரு பெண் கன்று ஈன்றது. தற்சமயம் பூங்காவில் 24 காட்டு மாடுகள் உள்ளன. இவை அருகருகே உள்ள இரு இருப்பிடங்களில் பார்வையாளர்களுக்கு காட்சிப்படுத்தப்பட்டுள்ளது.

இந்திய கண்டத்தில் மட்டுமே காணப்படும் நீலமான் மிகச்சிறந்த முறையில் இங்கு இனப்பெருக்கம் செய்கின்றன.

நீலமான் இணை சமீபத்தில் 2 குட்டிகளை ஈன்றுள்ளது. தற்சமயம் பூங்காவில் 11 நீலமான்கள் உள்ளன. பூங்காவில் இந்திய பழுப்பு நிற ஓநாயும் சிறந்த முறையில் இனப்பெருக்கம் செய்கின்றன. கீர்த்தி மற்றும் வசந்தன் இணை ஓநாய்கள் சமீபத்தில் 4 ஆண் மற்றும் 3 பெண் குட்டிகள் என மொத்தம் 7 குட்டிகளை ஈன்றது. இந்த இணை இத்துடன் 3-வது முறையாக குட்டிகளை ஈன்றுள்ளது.

புதிதாக பிறந்துள்ள குட்டிகள் தொடர் மருத்துவ கண்காணிப்பில் நல்ல முறையில் பராமரிக்கப்பட்டு வருகின்றன.

காணும் பொங்கல் நாளான இன்று (வெள்ளிக்கிழமை) பலவிதமான சிறப்பு ஏற்பாடுகள் பார்வையாளர்களை மகிழ்விக்க பூங்கா நிர்வாகம் மேற்கொண்டுள்ளது. பூங்காவிற்கு வரும் பார்வையாளர்கள் பிறந்த குட்டிகளை பெரிய காட்சிப்படுத்துதல் திரை மூலம் கண்டுகளிக்க ஏற்பாடு செய்யப்பட்டுள்ளது.

இந்த தகவல் பூங்கா நிர்வாகம் வெளியிட்டுள்ள செய்திக்குறிப்பில் தெரிவிக்கப்பட்டுள்ளது.