விருத்தாசலத்தில், நிர்வாண கோலத்தில் திருட முயன்ற மர்மநபர்கள் - சமூக வலைதளத்தில் வைராகும் வீடியோவால் பரபரப்பு

விருத்தாசலம், 

விருத்தாசலம் வி.என்.ஆர்.நகரை சேர்ந்தவர் தாமஸ் (வயது 40). இவர் நேற்று முன்தினம் இரவு சாப்பிட்டு விட்டு வழக்கம்போல் குடும்பத்துடன் தூங்கிக்கொண்டிருந்தார். இந்த நிலையில் நேற்று அதிகாலை 3.30 மணி அளவில் மர்மநபர் ஒருவர் வீட்டின் பக்க வாட்டு சுவரில் இருந்த ஜன்னலை திறந்து அதன் வழியாக அங்கிருந்த செல்போனை திருட முயற்சி செய்தார்.

அந்த நேரத்தில் வீட்டில் இருந்த குழந்தை அழுததால் தாமசின் குடும்பத்தினர் தூக்கத்தில் இருந்து எழுந்து மின்விளக்கை போட்டனர். அப்போது மர்மநபர் செல்போன் திருட முயற்சி செய்வதை பார்த்து அவர்கள் அதிர்ச்சி அடைந்தனர். பின்னர் அவர்கள் திருடன், திருடன் என கூச்சலிட்டனர். அதை கேட்டு அக்கம் பக்கத்து வீட்டில் இருந்தவர்கள் ஓடோடி வந்தனர். இதையறிந்த மர்மநபர் அங்கிருந்து தப்பி ஓடி அருகில் இருந்த ரம்ஜான் என்பவரது வீட்டு சுற்றுச்சுவரில் ஏறி குதித்து தப்பிச்சென்றார்.

இது குறித்த தகவலின் பேரில் விருத்தாசலம் போலீசார் சம்பவ இடத்துக்கு விரைந்து சென்று விசாரணை நடத்தினர். பின்னர் அவர்கள் பக்கத்தை வீட்டில் வசித்து வந்த அப்துல்மஜித் என்பவரது வீட்டில் அமைக்கப்பட்டிருந்த கண்காணிப்பு கேமராவில் பதிவாகி இருந்த வீடியோ காட்சிகளை பார்த்தனர். அப்போது தாமஸ் வீட்டில் நிர்வாண கோலத்தில் கையில் கம்புடன் மர்மநபர் ஒருவர் திருட முயன்றது தெரிந்தது. மேலும் அந்த நபர் முதலில் அப்துல்மஜித்தின் வீட்டில் திருட முயன்றுள்ளார்.

ஆனால் வீட்டின் கதவு உள்பக்கமாக பூட்டப்பட்டு இருந்ததால், அங்கு திருடும் முயற்சியை கைவிட்டுள்ளார். பின்னர் அவர் அங்கிருந்து தாமசின் வீட்டுக்கு சென்று அங்கிருந்த ஜன்னல் வழியாக செல்போனை திருட முயன்றுள்ளார். அப்போது அக்கம் பக்கத்தினர் வரவே அவர் அங்கிருந்து தப்பிச்சென்றது தெரிந்தது.

இந்த வீடியோ பதிவை கொண்டு மர்மநபரை போலீசார் வலைவீசி தேடி வருகின்றனர். இதனிடையே நிர்வாண கோலத்தில் மர்மநபர் திருட முயன்ற சம்பவம் தொடர்பான வீடியோ சமூக வளைதளங்களான முகநூல், வாட்ஸ்–அப் ஆகியவற்றில் வைராக பரவி வருகிறது. இதனால் விருத்தாசலத்தில் பெரும் பரபரப்பு ஏற்பட்டுள்ளது.