சாலையின் குறுக்கே நாய் வந்ததால் மோட்டார் சைக்கிளில் இருந்து தவறி விழுந்து வாலிபர் பலி

நொய்யல்,

கரூர் மாவட்டம், நொய்யல் அருகே உள்ள மறவாபாளையம் மகாத்மாகாந்தி நகரை சேர்ந்தவர் முருகேசன். இவரது மகன் தனபால் (வயது 20). இவர் நேற்று முன்தினம் தனது மோட்டார் சைக்கிளில் வீட்டில் இருந்து வேலாயுதம்பாளையம் நோக்கி சென்று கொண்டிருந்தார்.

நடையனூர் அருகே சென்று கொண்டிருந்தபோது சாலையின் குறுக்கே திடீரென நாய் ஓடியது. அதன் மீது மோதாமல் இருப்பதற்காக தனபால் தனது மோட்டார் சைக்கிளை பிரேக் பிடித்து நிறுத்தினார். அப்போது எதிர்பாராத விதமாக மோட்டார் சைக்கிளில் இருந்து தனபால் கீழே விழுந்து பலத்த காயம் அடைந்து உயிருக்கு போராடினார்.

வாலிபர் பலி

இதைக்கண்ட அங்கிருந்தவர்கள் படுகாயமடைந்த தனபாலை மீட்டு ஆம்புலன்சு மூலம் சிகிச்சைக்காக வேலாயுதம்பாளையம் அரசு மருத்துவமனைக்கு அனுப்பி வைத்தனர். அங்கு தனபாலை பரிசோதித்த டாக்டர்கள் அவர் ஏற்கனவே இறந்து விட்டதாக தெரிவித்தனர். இந்த விபத்து குறித்த புகாரின்பேரில் வேலாயுதம்பாளையம் போலீஸ் சப்-இன்ஸ்பெக்டர் அருள்செல்வன் வழக்குப்பதிவு செய்து விசாரணை நடத்தி வருகிறார்.