காரைக்காலில் சுற்றுச்சூழல், உடல் ஆரோக்கியம் குறித்த விழிப்புணர்வு ஓட்டம்

காரைக்கால்,

காரைக்கால் மாவட்ட சமுதாய நலப்பணித் திட்டம் (சிஎஸ்எஸ்) சார்பில் உடல் ஆரோக்கியம் மற்றும் சுற்றுச்சூழல் பாதுகாப்பு விழிப்புணர்வு ஏற்படுத்தும் வகையில், சிறப்பு விழிப்புணர்வு ஓட்டம், காரைக்கால் கோவிந்தசாமிப் பிள்ளை அரசு உயர்நிலைப் பள்ளியில் நடைபெற்றது.

இந்த விழிப்புணர்வு ஓட்டத்தை மாவட்ட முதன்மைக் கல்வி அதிகாரி அல்லி கொடியசைத்து தொடங்கிவைத்தார். மேல்நிலைக் கல்வி துணை இயக்குனர் கோவிந்தராஜன், சமுதாய நலப்பணித் திட்ட மாவட்ட ஒருங்கிணைப்பாளர் முருகன் ஆகியோர் இதன் நோக்கம் குறித்துப் பேசினர்.

மாணவர்கள் உடல் திறனை மேம்படுத்துவதற்கும், சுற்றுச்சூழலைப் பாதுகாக்கும் விதமாக பிளாஸ்டிக்கை அகற்றும் விதமாக இந்த ஓட்டம் நடைபெற்றது. மாணவ, மாணவிகள் ஓடிக்கொண்டே சாலைகளில் உள்ள பிளாஸ்டிக்கை அகற்றினர். சிறிது தூரம் வரை பள்ளி சுற்றுவட்டாரத்தில் இந்த ஓட்டம் நடைபெற்றது. இந்த நிகழ்ச்சியில் பள்ளி மூத்த ஆசிரியர் இமானுவேல், திட்ட அலுவலர் சரஸ்வதி பாலா, முருகாத்தாளாட்சி அரசு உயர்நிலைப் பள்ளி திட்ட அலுவலர் அன்பழகன் உள்ளிட்ட பலர் கலந்துகொண்டனர். காரைக்கால் மாவட்டத்தில் இதுபோல 22 அரசு பள்ளிகளில் அந்தந்த பள்ளியின் சமுதாய நலப்பணித் திட்டத்தின் சார்பில் விழிப்புணர்வு ஓட்டம் நடைபெற்றது.