சிவகங்கை அருகே கோவானூர், ஊருணியில் பாண்டியர் கால கல்வெட்டுகள் கண்டுபிடிப்பு

சிவகங்கை, 

சிவகங்கையை அடுத்த கோவானூரில் உள்ள ஊருணியில் பழமையான கல்வெட்டுகள் இருந்தன. அதைத்தொடர்ந்து தொல்லியல் ஆய்வு நிறுவன தலைவர் ராஜகுரு, தொல்லியல் ஆய்வாளர்கள் கொல்லங்குடி காளிராசா, ராமநாதபுரம் விமல்ராஜ் ஆகியோர் அங்கு சென்று ஆய்வு செய்தனர். அப்போது அங்கிருந்த கல்வெட்டுகள் கி.பி.13-ம் நூற்றாண்டை சேர்ந்தவை என்பது தெரிந்தது.

இதுபற்றி கல்வெட்டு ஆய்வு நிறுவன தலைவர் கூறியதாவது:- சிவகங்கையிலிருந்து 10 கி.மீ. தூரத்தில் உள்ளது கோவானூர். இந்த ஊரின் முகப்பில் ஒரு ஊருணி உள்ளது. இதன் கிழக்குக்கரையில் படித்துறையும், வடக்கில் ஒரு வரத்துக்கால்வாயும் உள்ளன.

இவை சுமார் 300 ஆண்டுகளுக்கு முன் அமைக்கப்பட்டவை. இதில் பயன்படுத்தப்பட்டுள்ள கற்கள் இடிந்துபோன கோவிலில் இருந்து எடுத்துவரப்பட்டதாக உள்ளன. இத்தகைய கற்கள் இந்த ஊரின் பல இடங்களிலும் சிதறிக் கிடக்கின்றன.

இதில் வெவ்வேறு தகவல்களைக் கொண்ட பழமையான 6 துண்டு கல்வெட்டுகள் கண்டுபிடிக்கப்பட்டுள்ளன. இவை கி.பி.13-ம் நூற்றாண்டைச் சேர்ந்த பாண்டியர் கால கல்வெட்டுகள் என்பது தெரிந்தது. அவற்றின் மூலம் இந்த ஊரில் திருவகத்தீஸ்வரமுடையார் என்ற சிவன் கோவில் இருந்துள்ளதை அறியமுடிகிறது. அழிந்து போன அந்த சிவன் கோவில் கற்களை பயன்படுத்தி படித்துறை கட்டியுள்ளனர்.

ஒரு வேலி, இரு மா

கி.பி.1216 முதல் கி.பி.1244 வரை மதுரையை தலைநகராக கொண்டு ஆண்ட முதலாம் மாறவர்மன் சுந்தரபாண்டியனின் மெய்க்கீர்த்தி பாடலான பூமருவிய திருமடந்தையும், புவிமடந்தையும் எனத் தொடங்கும் 9 வரிகள் இந்த கல்வெட்டில் உள்ளன. இதில் தஞ்சையும் உறந்தையும் செந்தழல் கொளுத்தியது, மாளிகையும், மண்டபமும் இடித்தது என்பது போன்ற தகவல்கள் உள்ளன.

இந்த ஊர் சிவன் கோவிலுக்கு தேவதானமாக இரு ஊர்கள் வழங்கப்பட்டுள்ளன. இந்த ஊர்களில் ஏற்கனவே வழங்கப்பட்ட, ஒரு வேலி, இரு மா அளவுள்ள நிலம் நீக்கி, மீதமுள்ள பகுதி தானமாகக் கொடுக்கப்பட்டுள்ளதாக கூறப்பட்டுள்ளது. பறை வரி, கடமை வரி ஆகிய வரிகள் மற்றும் பாண்டீஸ்வரமுடையார் எனும் கோவிலைச் சேர்ந்த சிவபிராமணர் பற்றியும் கல்வெட்டில் சொல்லப்பட்டுள்ளது.

இந்த கல்வெட்டுகளில் அரசின் வரிக்கணக்கை நிர்வகிக்கும் மூன்று புரவரி திணைக்கள நாயகம் மற்றும் உழக்குடி முத்தன், தச்சானூருடையன், வீரபஞ்சான், முனையத்தரையன், அழகனான வானவன், விழயராயன், வந்தராயன் ஆகிய அரசு அதிகாரிகளின் பெயர்கள் எழுதப்பட்டுள்ளன.

மிழலைக் கூற்றத்து நடுவிற் கூற்று, கீழ்க்கூற்று, மதுரோதய வளநாடு, கீரனூர் நாடு, காகையிருக்கை ஆகிய நாடுகளும், நல்லூர், மிழலைக் கூற்றத்து தச்சனூர், புல்லூர்க்குடி, மதுரோதய வளநாட்டு புறப்பற்று, காகையிருக்கை உழக்குடி ஆகிய ஊர்களும் கல்வெட்டில் குறிப்பிடப்பட்டுள்ளன. இந்த ஊர் முருகன் கோவிலில் உள்ள ஒரு கல்வெட்டு மூலம் இவ்வூர் கீரனூர் நாட்டில் இருந்தாக அறியமுடிகிறது.

கல்வெட்டில் வேலி, இருமா ஆகிய நில அளவுகளைக் குறிக்க குறியீடுகள் பயன்படுத்தப்பட்டுள்ளன. நெடில் எழுத்துகள் பெரும்பாலும் கல்வெட்டில் வருவதில்லை. இதில் ஒரு கல்வெட்டில் நீக்கி, நீக்கி என்ற சொல் நெடிலாகவும், மற்றொன்றில் நிக்கி நிக்கி என குறிலாகவும் வருகிறது.

இந்த ஊர் பொட்டலில் சங்ககாலத்தைச் சேர்ந்த கருப்பு சிவப்பு பானை ஓடுகள் காணப்படுகின்றன. அங்கு கி.பி. 11-ம் நூற்றாண்டை சேர்ந்த அமர்ந்த நிலையிலான ஒரு திருமால் சிற்பம் உள்ளது. இவ்வாறு அவர் கூறினார்.