தாலி கட்டும் நேரத்தில் பட்டுச்சேலை கட்டிவர சென்ற மணப்பெண் ஓட்டம் - திருமணம் நின்றதால் மணமகன் தவிப்பு

குடியாத்தம், 

வேலூர் மாவட்டம் குடியாத்தத்தை அடுத்த அணங்காநல்லூர் மோட்டூர் கிராமத்தை சேர்ந்தவர் பிச்சாண்டி. அவருடைய மகன் விநாயகம் (வயது 28), கட்டிட மேஸ்திரி. இவருக்கும், அவருடைய உறவினரான வாணியம்பாடி பகுதியை சேர்ந்த 20 வயது இளம் பெண்ணுக்கும் திருமணம் நிச்சயிக்கப்பட்டிருந்தது.

இவர்களது திருமணம் நேற்று குடியாத்தம் காமாட்சியம்மன் பேட்டையில் உள்ள சுப்பிரமணிய சுவாமி கோவில் திருமண மண்டபத்தில் நடைபெற இருந்தது. இதற்காக நேற்று முன்தினம் இரவே மணமக்களின் உறவினர்கள், நண்பர்கள் திருமண மண்டபத்திற்கு வந்திருந்தனர். இரவில் மணமக்கள் அழைப்பு நடைபெற்று அனைவருக்கும் அறுசுவை உணவு பரிமாறப்பட்டது.

அதன் பின்னர் அனைவரும் தூங்க சென்று விட்டனர். நேற்று அதிகாலை மீண்டும் திருமண வீடு களைகட்டியது. தாலிகட்டும் நிகழ்ச்சிக்காக மணமேடை தயார் ஆனது. மணப்பெண்ணுக்கு திருமண சடங்கு நடைபெற்றது. பின்னர் திருமண பட்டுச்சேலை கட்டிவர மணப்பெண் அறைக்கு சென்றார்.

மணமகன் மற்றும் உறவினர்கள் அனைவரும் திருமண மண்டபத்தில் மகிழ்ச்சியுடன் காத்து இருந்தனர். ஆனால் பட்டுச்சேலை கட்டி வரச்சென்ற மணமகள் நீண்ட நேரமாகியும் வராததால் உறவினர்கள் சந்தேகம் அடைந்தனர். மணமகள் அறைக்கு சென்று பார்த்த போது அவர் இல்லாததை கண்டு அதிர்ச்சி அடைந்தனர்.

மணப்பெண் மாயமாகிவிட்டார் என்ற தகவல் திருமணமண்டபத்தில் காத்திருந்தவர்களுக்கு தெரியவந்ததும் அங்கு பரபரப்பு ஏற்பட்டது. தாலிகட்டும் நேரத்தில் இப்படி ஆகிவிட்டதே என்று மணமகனும், மணமகன் வீட்டாரும் தவித்தார்கள். இதனையடுத்து மணமகளின் பெற்றோர் மற்றும் உறவினர்கள் மணப்பெண்ணை பல்வேறு இடங்களில் தேடிய போதும் எந்தவித தகவலும் கிடைக்கவில்லை. இதனால் தாலி கட்டும் நேரத்தில் திருமணம் நின்றது.

மணமக்களை வாழ்த்துவதற்காக மண்டபத்தில் கூடியிருந்த உறவினர்கள் ஒவ்வொருவராக அங்கிருந்து வெளியேறினார்கள். திருமணகளை கட்டி இருந்த மண்டபம் வெறிச்சோடியது.

மணப்பெண்ணின் பெற்றோர் குடியாத்தம் டவுன் போலீசில் புகார் செய்தனர். அதன்பேரில் போலீசார் வழக்கு பதிவு செய்து மாயமான மணப்பெண் குறித்து விசாரணை நடத்தி வருகின்றனர்.