பக்ரீத் பண்டிகையையொட்டி பள்ளிவாசல்களில் சிறப்பு தொழுகை

தஞ்சாவூர்,

முஸ்லிம்கள் கொண்டாடும் பண்டிகைகளில் முக்கியமானது பக்ரீத் பண்டிகை. இந்த பண்டிகையானது தியாகத் திருநாள் என்றும் அழைக்கப்படுகிறது. இந்த பக்ரீத்பண்டிகை நேற்று உலகம் முழுவதும் கொண்டாடப்பட்டது. இதையொட்டி அனைத்து நகரங்களிலும் இஸ்லாமியர்கள் சிறப்பு தொழுகை நடத்தினர். தொழுகை முடிந்ததும் ஒருவருக்கொருவர் வாழ்த்துக்களை பகிர்ந்து கொண்டனர்.

தஞ்சை காந்திஜிசாலை புதுஆற்றுப்பாலம் அருகே உள்ள ஜும்மா பள்ளிவாசலில் பக்ரீத் பண்டிகையையொட்டி சிறப்பு தொழுகை நடந்தது. இதில் திரளான முஸ்லிம்கள் புத்தாடை அணிந்து கலந்து கொண்டனர். இதே போல் தஞ்சை நகரில் உள்ள அனைத்து பள்ளிவாசல்களிலும் நேற்று சிறப்பு தொழுகை நடைபெற்றது.

வாழ்த்துக்களை பரிமாறினர்

இதே போல் தஞ்சை பெசன்ட் அரங்கத்திலும் முஸ்லிம்கள் சிறப்பு தொழுகை நடத்தினர். தொழுகை முடிந்தவுடன் ஒருவருக்கொருவர் கைகுலுக்கியும், கட்டித் தழுவியும் தங்களது வாழ்த்துக்களை பரிமாறிக் கொண்டனர். சிறுவர், சிறுமிகளும் தங்களுக்குள் வாழ்த்துக்களை பரிமாறிக் கொண்டதுடன், பெரியவர்களிடம் வாழ்த்து பெற்றனர்.