தனித்தனி விபத்தில் 2 பேர் பலி

விழுப்புரம், 

திருவெண்ணெய்நல்லூர் அன்னை இந்திரா நகரை சேர்ந்தவர் சக்திவேல் (வயது 45), கூலித்தொழிலாளி. சம்பவத்தன்று இவர் தனது மோட்டார் சைக்கிளில் திருவெண்ணெய்நல்லூரில் இருந்து கடலூர் மார்க்கமாக சென்றார்.

சுந்தரேசபுரம் என்ற இடத்தில் சென்றபோது நிலைதடுமாறி மோட்டார் சைக்கிளில் இருந்து தவறி கீழே விழுந்தார். இதில் பலத்த காயமடைந்த அவரை அக்கம், பக்கத்தினர் மீட்டு சிகிச்சைக்காக முண்டியம்பாக்கம் அரசு மருத்துவமனையில் சேர்த்தனர். பின்னர் அங்கிருந்து மேல்சிகிச்சைக்காக புதுச்சேரி ஜிப்மர் மருத்துவமனையில் அனுமதிக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்தும் பலனின்றி நேற்று காலை இறந்தார்.

இந்த விபத்து குறித்து திருவெண்ணெய்நல்லூர் போலீசார் வழக்குப்பதிவு செய்து விசாரணை நடத்தி வருகின்றனர்.

இதேபோல் கண்டமங்கலம் அருகே உள்ள பனங்குப்பத்தை சேர்ந்தவர் கோவிந்தராசு (64), இவர் நேற்று முன்தினம் தனது மோட்டார் சைக்கிளில் புதுச்சேரிக்கு சென்று விட்டு மீண்டும் அங்கிருந்து பனங்குப்பத்திற்கு புறப்பட்டார்.

கண்டமங்கலம் நவமால்மருதூர் கூட்டுசாலை அருகில் சென்றபோது பின்னால் வந்த லாரி மோதியதில் கோவிந்தராசு பலத்த காயமடைந்தார். உடனே அவரை அக்கம், பக்கத்தினர் மீட்டு சிகிச்சைக்காக புதுச்சேரி ஜிப்மர் மருத்துவமனையில் சேர்த்தனர். அங்கு அவருக்கு டாக்டர்கள் தீவிர சிகிச்சை அளித்தும் பலனின்றி இறந்தார்.

விபத்து குறித்த புகாரின்பேரில் கண்டமங்கலம் போலீசார் வழக்குப்பதிவு செய்து விசாரணை நடத்தி வருகின்றனர்.