பொள்ளாச்சி அரசு ஆஸ்பத்திரியில் பரபரப்பு, பிறந்து 7 நாட்களே ஆன பச்சிளம் குழந்தை கடத்தல் - பெண்ணுக்கு வலைவீச்சு

பொள்ளாச்சி,

கோவை மாவட்டம் ஆனைமலை அருகே உள்ள நரிக்கல்பதி கிராமத்தை சேர்ந்தவர் பாலன் (வயது 40), கூலித்தொழிலாளி. இவருடைய மனைவி தேவி (30). இந்த தம்பதிக்கு நித்தின் (6), பிரசாந்த் (3) என 2 மகன்கள் உள்ளனர். இந்த நிலையில் தேவி 3-வது முறையாக கர்ப்பமானார்.

நிறைமாத கர்ப்பிணியான அவர் கடந்த 29-ந் தேதி மதியம் பொள்ளாச்சி அரசு ஆஸ்பத்திரியில் பிரசவத்துக்காக அனுமதிக்கப்பட்டார். அன்று இரவு 10 மணி அளவில் சுகப்பிரசவரத்தில் அவருக்கு அழகான ஆண் குழந்தை பிறந்தது. பிரசவத்துக்கு பின் தேவிக்கு உதவியாக அவரது கணவர் மட்டும் இருந்துள்ளார்.

பிரசவத்துக்கு பிறகு தேவிக்கு குடும்ப கட்டுப்பாடு அறுவை சிகிச்சை செய்யப்பட்டது. இதனால் அவருக்கு குழந்தையை பார்த்துக்கொள்ள சிரமமாக இருந்தது. இந்த நிலையில் கடந்த 1-ந் தேதி தேவி யிடம் 45 வயது மதிக்கத்தக்க பெண் ஒருவர் பேச்சு கொடுத்தார். அவர், தனது உறவினர் ஆஸ்பத்திரி அனுமதிக்கப்பட்டு இருப்பதாகவும், நீங்கள் குழந்தையுடன் தனியாக சிரமப்படுவதால் தான் இரவு நேரத்தில் தங்கி உதவி செய்வதாகவும் தெரிவித்துள்ளார்.

இதற்கு சம்மதம் தெரிவித்ததால் அந்த பெண் தேவியை தனது மகள் போல் கவனித்துக்கொண்டார். இது தேவிக்கு அந்த பெண் மீது நம்பிக்கையை ஏற்படுத்தியது. தொடர்ந்து 5 நாட்களாக அந்த பெண் தேவிக்கு தேவையான உதவிகளை செய்து கொடுத்ததுடன் குழந்தையை எப்போதும் தூக்கி வைத்துக்கொண்டு கொஞ்சி மகிழ்ந்துள்ளார்.

இந்த நிலையில் சிகிச்சை முடிந்து தேவி நேற்று மதியம் குழந்தையுடன் வீட்டுக்கு புறப்பட தயாரானார். அப்போது அந்த பெண், குழந்தையை தூக்கிக்கொண்டு ஆஸ்பத்திரி வாசல் வரை வந்து வழியனுப்பி வைப்பதாக கூறினார். இதையடுத்து தேவி, அவரது கணவர் பாலன் ஆகியோருடன் அந்த பெண், குழந்தையை தூக்கிக்கொண்டு பிரசவ வார்டில் இருந்து வெளியே வந்தார்.

அப்போது திடீர் என்ற அந்த பெண், குழந்தைக்கு காலில் கொப்பளம் உள்ளது. எனவே தோல் டாக்டரிடம் காண்பித்து வருகிறேன் நீங்கள் சென்று குழந்தைக்கான சொட்டு மருந்து வாங்கி வாருங்கள் என்று பாலனிடம் கூறினார். பின்னர் அந்த பெண் குழந்தையுடன் டாக்டர் அறையை நோக்கி சென்றார். தேவியும், கணவர் பாலனுடன் சென்றார். இருவரும் மருந்து வாங்கிவிட்டு சிறிது நேரத்தில் வந்தனர். குழந்தையுடன் அந்த பெண் வருவார் என்று அங்கேயே காத்திருந்தனர்.

ஆனால் வெகுநேரம் ஆகியும் குழந்தையுடன் அந்த பெண் வரவில்லை. இதனால் பதறிபோன தம்பதியினர் உடனடியாக தோல் டாக்டர் அறைக்கு சென்றனர். அங்கு அந்த பெண் இல்லை. இதனால் அதிர்ச்சி அடைந்த அவர்கள் ஆஸ்பத்திரி முழுவதும் தேடினார்கள். ஆனால் அந்த பெண் எங்கும் இல்லை. அப்போதுதான் அந்த பெண் குழந்தையை கடத்திச்சென்றதை அவர்கள் உணர்ந்தனர்.

குழந்தையை காணாததால் தேவி கதறி துடித்தார். இது குறித்த புகாரின் பேரில் பொள்ளாச்சி போலீசார் மருத்துவமனையில் கண்காணிப்பு கேமராவில் பதிவான காட்சிகளை கொண்டு போலீசார் குழந்தையை கடத்தி சென்ற பெண்ணையும் அவரது கணவரையும் தேடி வருகிறார்கள்.