குரும்பூரில் மின்சாரம் தாக்கி எலக்ட்ரீசியன் பலி

தென்திருப்பேரை,

தூத்துக்குடி மாவட்டம் குரும்பூர் பள்ளிவாசல் தெருவைச் சேர்ந்தவர் ஜமீன் (வயது 52) எலக்ட்ரீசியன். இவர் சம்பவத்தன்று தனது வீட்டில் பழுதடைந்த மின்விசிறியை பழுது நீக்க முயன்றார். அப்போது எதிர்பாராதவிதமாக ஜமீன் மீது மின்சாரம் தாக்கியது. இதில் அவர் தூக்கி வீசப்பட்டு உயிருக்கு போராடினார்.

இதை பார்த்த அக்கம்பக்கத்தினர் அவரை மீட்டு சிகிச்சைக்காக திருச்செந்தூர் அரசு ஆஸ்பத்திரிக்கு கொண்டு சென்றனர். ஆனால் அங்கு செல்லும் வழியிலேயே ஜமீன் பரிதாபமாக உயிரிழந்தார்.

இதுகுறித்த புகாரின்பேரில், குரும்பூர் போலீசார் வழக்குப்பதிவு செய்து விசாரணை நடத்தி வருகின்றனர். மின்சாரம் தாக்கி இறந்த ஜமீனுக்கு ஹமீதா பேகம் என்ற மனைவியும், செய்யது அபுதாஹிர் (14) என்ற மகனும் உள்ளனர்.