தமிழகத்தில் கான்ஸ்டபிள் பணிக்கு 8826 இடங்கள்

தற்போது இந்த அமைப்பு தமிழக காவல்துறை, சிறைத்துறை, மற்றும் தீயணைப்பு பிரிவில் கான்ஸ்டபிள் (இரண்டாம் நிலை காவலர்) பணியிடங்களை நிரப்ப அறிவிப்பு வெளியிட்டு உள்ளது.

காவல்துறையில் ஆண்களுக்கு 5 ஆயிரத்து 962 இடங்களும், பெண்கள் மற்றும் திருநங்கைகளுக்கு 2 ஆயிரத்து 465 இடங்களும், சிறைத்துறையில் மொத்தம் 208 இடங்களும், தீயணைப்பு மற்றும் மீட்புப் பணிகள் துறையில் 191 இடங்களும் அறிவிக்கப்பட்டு உள்ளன. மொத்தம் 8 ஆயிரத்து 826 இடங்கள் நிரப்பப்படுகிறது.

இந்த பணிகளுக்கு 1-7-2019-ந் தேதியில் 24 வயதுக்கு உட்பட்டவர்கள் விண்ணப்பிக்கலாம். இட ஒதுக்கீடு பெறுபவர்களுக்கு தமிழக அரசு விதிகளின்படி வயது வரம்பு தளர்வு அனுமதிக்கப்படுகிறது. 10-ம் வகுப்பு தேர்ச்சி பெற்றவர்கள் விண்ணப்பிக்கலாம். அவர்கள் தமிழை ஒரு பாடமாக படித்திருப்பது அவசியம்.

எழுத்துத் தேர்வு, உடல் தகுதி மற்றும் உடல்திறன் தேர்வு, சிறப்பு மதிப்பெண்கள் ஆகியவற்றின் அடிப்படையில் தகுதியானவர்கள் தேர்வு செய்யப்படுவார்கள். விருப்பமும், தகுதியும் உள்ளவர்கள் விரிவான விவரங்களை www.tnusrbonline.org/ என்ற இணையதளத்தில் பார்த்துவிட்டு ஏப்ரல் 8-ந் தேதிக்குள் விண்ணப்பம் சமர்ப்பிக்கலாம்.