புதுக்கடை அருகே பரிதாபம் மின்கம்பத்தில் மோட்டார் சைக்கிள் மோதியது; 2 வாலிபர்கள் பலி

புதுக்கடை,

குமரி மாவட்டம் தேங்காப்பட்டணம் அருகே இனயத்தை சேர்ந்த சாகுல் அமீது மகன் சராபுதீன் (வயது 20). மார்த்தாண்டத்தில் ஒரு செருப்பு கடையில் வேலை பார்த்த வந்தார். இவரும், நம்பாளியை சேர்ந்த நவுசாத் மகன் செய்யது முகமது நசீப் (19) என்பவரும் நண்பர்கள். இவர்கள் இருவரும் நேற்று முன்தினம் இரவு பனங்கால்முக்கு பகுதியில் நடந்த கோவில் திருவிழாவுக்கு வேடிக்கை பார்க்க சென்றனர். விழா முடிந்து நள்ளிரவு ஒரு மோட்டார் சைக்கிளில் இனயம் நோக்கி சென்றனர்.

புதுக்கடை அருகே நெடுந்தட்டு பகுதியில் சென்ற போது, அந்த பகுதியில் சாலையில் ஜல்லிக்கற்கள் குவித்து வைக்கப்பட்டு இருந்தது. ஜல்லிக்கற்கள் மீது ஏறிய மோட்டார் சைக்கிள் நிலைதடுமாறி சாலையோரம் நின்ற மின்கம்பத்தில் பயங்கரமாக மோதியது.

இதில், சராபுதீனும், செய்யது முகமது நசீபும் சாலையில் தூக்கி வீசப்பட்டனர். தலையில் பலத்த காயம் அடைந்த அவர்கள் சம்பவ இடத்திலேயே பரிதாபமாக இறந்தனர். இந்த விபத்து குறித்து அந்த வழியாக சென்றவர்கள் புதுக்கடை போலீசுக்கு தகவல் கொடுத்தனர். போலீசார் சம்பவ இடத்துக்கு சென்று 2 பேரது உடல்களையும் மீட்டு குழித்துறை அரசு ஆஸ்பத்திரிக்கு அனுப்பி வைத்தனர்.

இந்த விபத்து குறித்து புதுக்கடை போலீசார் வழக்குப்பதிவு செய்து விசாரணை நடத்தி வருகிறார்கள். மோட்டார் சைக்கிள் விபத்தில் 2 வாலிபர்கள் பலியான சம்பவம் அந்த பகுதியில் சோகத்தை ஏற்படுத்தியுள்ளது.