வெவ்வேறு விபத்துகளில் முதியவர் உள்பட 2 பேர் சாவு

தேன்கனிக்கோட்டை, 

கிருஷ்ணகிரி மாவட்டம் தேன்கனிக்கோட்டை அருகே உள்ள கல்பாலம் கிராமத்தை சேர்ந்தவர் சிவா (வயது 28). இவர் ஜவளகிரியில் இருந்து கல்பாலம் நோக்கி மோட்டார்சைக்கிளில் சென்று கொண்டிருந்தார். அகலக்கோட்டை ஏரிக்கரையில் சென்ற போது அந்த வழியாக வந்த 60 வயது மதிக்கத்தக்க முதியவர் ஒருவர் குறுக்கே வந்தார். அப்போது எதிர்பாராதவிதமாக மோட்டார்சைக்கிள் முதியவர் மீது மோதியது. இதில் படுகாயம் அடைந்த முதியவர் பரிதாபமாக இறந்தார். படுகாயம் அடைந்த சிவா கிருஷ்ணகிரி அரசு ஆஸ்பத்திரியில் சிகிச்சை பெற்று வருகிறார். விபத்து குறித்து அறிந்த தளி போலீசார் சம்பவ இடத்திற்கு விரைந்து சென்று விசாரணை நடத்தினர். ஆனால் இறந்தவர் யார்? எந்த ஊரை சேர்ந்தவர் என்ற விவரம் உடனடியாக தெரியவில்லை. இதைத் தொடர்ந்து இறந்த முதியவரின் உடலை கைப்பற்றி பிரேத பரிசோதனைக்காக தேன்கனிக்கோட்டை அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.

தேன்கனிக்கோட்டை கிசான் தெருவை சேர்ந்தவர் சீனிவாசன் (23). அண்ணாநகரை சேர்ந்தவர் சதீஷ் (18). இவர்கள் இருவரும் நண்பர்கள். இவர்கள் நேற்று முன்தினம் தளியில் இருந்து தேன்கனிக்கோட்டைக்கு மோட்டார்சைக்கிளில் சென்று கொண்டிருந்தனர். தேன்கனிக்கோட்டை அண்ணாநகர் கூட்டுரோட்டில் வந்தபோது கட்டுப்பாட்டை இழந்த மோட்டார்சைக்கிள் சாலையோரம் நின்ற டிராக்டர் மீது மோதியது.

இதில் படுகாயம் அடைந்த சீனிவாசன் சம்பவ இடத்திலேயே பரிதாபமாக இறந்தார். விபத்து குறித்து அறிந்த தேன்கனிக்கோட்டை போலீசார் சம்பவ இடத்திற்கு சென்று சீனிவாசனின் உடலை கைப்பற்றி பிரேத பரிசோதனைக்காக தேன்கனிக்கோட்டை அரசு ஆஸ்பத்திரிக்கு அனுப்பி வைத்தனர். மேலும் சதீசை மீட்டு தேன்கனிக்கோட்டை அரசு ஆஸ்பத்திரியில் சிகிச்சைக்காக சேர்த்தனர். இந்த விபத்து குறித்து தேன்கனிக்கோட்டை போலீசார் வழக்குப்பதிவு செய்து விசாரணை நடத்தி வருகின்றனர்.