ஸ்ரீரங்கத்தில் 3 மாத ஆண் குழந்தை கடத்தல் போலீசார் விசாரணை

ஸ்ரீரங்கம்,

ஸ்ரீரங்கம் மின்வாரிய அலுவலகம் முன்பு மீன்மார்க்கெட் அருகே வசித்து வருபவர் மாணிக்கம்(வயது 22). இவர் கூடை பின்னும் தொழில் செய்து வருகிறார். இவருக்கு நிரந்தரமாக வீடு இல்லாததால் அவ்வப்போது பல்வேறு இடங்களில் சாலையோரத்தில் மனைவி மற்றும் குழந்தையுடன் தங்கி கொள்வார்.

நேற்று முன்தினம் மாலை மாணிக்கம் திருவானைக்காவல் பெரியார்நகர் பாலம் அருகே மனைவி மற்றும் தனது 3 மாத ஆண் குழந்தை வேலுவுடன் தூங்கி கொண்டு இருந்தார்.

அப்போது அங்கு வந்த மர்ம நபர் திடீரென குழந்தையை தூக்கி கொண்டு ஓட்டம் பிடித்தார். சிறிதுநேரத்தில் கண்விழித்து பார்த்த மாணிக்கம், குழந்தை கடத்தப்பட்டு இருந்ததை கண்டு அதிர்ச்சி அடைந்தார். இது குறித்து ஸ்ரீரங்கம் போலீஸ் நிலையத்தில் அவர் புகார் அளித்தார். அதன்பேரில் போலீசார் வழக்குப்பதிவு செய்து, அந்த பகுதியில் பொருத்தப்பட்டுள்ள கண்காணிப்பு கேமராக்களில் பதிவான காட்சிகளை பார்வையிட்டு, குழந்தையை கடத்தி சென்ற மர்ம நபர் குறித்து விசாரணை நடத்தி வருகிறார்கள்.