ஓசூரில், வீட்டில் திருட முயன்ற போது மாடியில் இருந்து தவறி விழுந்தவர் சாவு

ஓசூர், 

கிருஷ்ணகிரி மாவட்டம் ஓசூர் ஜூஜூவாடி எஸ்.எல்.வி. நகரில் அடுக்குமாடி குடியிருப்பில் வசித்து வருபவர் பரத்குமார் (வயது 46). இவர் டிரான்ஸ்போர்ட் நிறுவனம் நடத்தி வருகிறார். நேற்று முன்தினம் நள்ளிரவு 30 வயது மதிக்கத்தக்க மர்ம நபர் ஒருவர் இவருடைய வீட்டிற்குள் நுழைந்து திருட முயன்றார். சத்தம் கேட்டு அக்கம்பக்கத்தினர் வெளியே வந்து பார்த்தனர்.

அப்போது மர்ம நபர் அங்கிருந்து தப்பி ஓட முயன்றார். இதனால் அதிர்ச்சி அடைந்த அவர்கள், திருடன், திருடன் என கூச்சலிட்டனர். பயந்து போன அந்த நபர் பொதுமக்களிடம் இருந்து தப்பிப்பதற்காக மாடியில் இருந்து இரும்பு குழாய் வழியாக வேகமாக கீழே இறங்க முயன்றார். அவர் குடிபோதையில் இருந்ததாக கூறப்படுகிறது.

அந்த நேரம் எதிர்பாராதவிதமாக மர்ம நபர் மாடியில் இருந்து தவறி கீழே விழுந்தார். இதில் பலத்த காயம் அடைந்த அவர் சம்பவ இடத்திலேயே உயிரிழந்தார். இது தொடர்பாக பரத்குமார், ஓசூர் சிப்காட் போலீஸ் நிலையத்திற்கு தகவல் தெரிவித்தார். அதன்பேரில் போலீசார் சம்பவ இடத்திற்கு விரைந்து சென்று விசாரணை நடத்தினர்.

இறந்தவர் யார்? எந்த ஊரை சேர்ந்தவர் என்ற விவரம் உடனடியாக தெரியவில்லை. பின்னர் அவருடைய உடலை கைப்பற்றி பிரேத பரிசோதனைக்காக ஓசூர் அரசு ஆஸ்பத்திரிக்கு அனுப்பி வைத்தனர். இது தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர். இந்த சம்பவம் அப்பகுதியில் பரபரப்பை ஏற்படுத்தி உள்ளது.