ஆரல்வாய்மொழி அருகே பெண்ணுடன் உல்லாசமாக இருப்பதில் தகராறு; வாலிபருக்கு கத்திக்குத்து, ஆட்டோ டிரைவரை போலீஸ் தேடுகிறது

ஆரல்வாய்மொழி,

குமரி மாவட்டம் ஆரல்வாய்மொழி பகுதியை சேர்ந்த ஒருவர், நாகர்கோவிலில் உள்ள ஒரு ஏ.டி.எம். மையத்தில் இரவுநேர காவலாளியாக உள்ளார். இவருக்கு மனைவியும், 2 குழந்தைகளும் உள்ளனர்.

ஏ.டி.எம். மைய காவலாளி மனைவிக்கும், அதே பகுதியை சேர்ந்த ஆட்டோ டிரைவர் ஒருவருக்கும் பழக்கம் ஏற்பட்டது. இந்த பழக்கம் நாளடைவில் இருவருக்கும் இடையே நெருக்கத்தை ஏற்படுத்தியது. காவலாளி இரவு பணிக்கு சென்ற பிறகு, ஆட்டோ டிரைவரும், அந்த பெண்ணும் உல்லாசமாக இருந்து வந்தனர்.

இதற்கிடையே அந்த பெண்ணுக்கும், நாகர்கோவில் ஒழுகினசேரி பகுதியை சேர்ந்த வாலிபர் ஒருவருக்கும் இடையே தொடர்பு ஏற்பட்டது. இந்த வாலிபரும் அந்த பெண்ணுடன் இரவு நேரங்களில் உல்லாசமாக இருந்து வந்தார். வாலிபருடன் புதிய பழக்கத்தை ஏற்படுத்திக் கொண்டாலும், ஆட்டோ டிரைவருடனான தொடர்பையும் அந்த பெண் விடவில்லை. இரவு நேரங்களில் கள்ளக்காதலர்களை சந்திக்கும் போது, அவர்கள் ஒருவருக்கொருவர் சந்தித்துக் கொள்ளாதபடி அந்த பெண் கவனமாக இருந்தார். மேலும் இருவரிடமும் உள்ள தொடர்பு ஒருவருக்கொருவர் தெரியாதபடியும் பார்த்துக் கொண்டார்.

நேற்றுமுன்தினம் இரவு அந்த பெண்ணின் கணவர் ஏ.டி.எம். மையத்துக்கு வேலைக்கு சென்றார். அந்த பெண்ணை சந்திக்க ஆட்டோ டிரைவர் வந்தார். இருவரும் தனிமையில் உல்லாசமாக இருந்தனர். அந்த பெண்ணின் இன்னொரு கள்ளக்காதலனான வாலிபரும், எந்த தகவலும் சொல்லாமல் அந்த பெண்ணின் வீட்டுக்கு நள்ளிரவில் வந்தார். வீட்டுக்கதவு உள்பக்கமாக பூட்டப்பட்டு இருந்தது.

கதவை நைசாக தட்டினார். கதவு தட்டும் சத்தம் கேட்டு அந்த பெண் அதிர்ச்சி அடைந்தார். யாராக இருக்கும் என்ற பயத்துடன் கதவை திறந்தார். வீட்டு வாசலில் அந்த வாலிபர் நின்று கொண்டிருந்தார். இதைக்கண்டு அந்த பெண் அதிர்ச்சி அடைந்தார். வீட்டுக்குள் அந்த பெண், இன்னொரு ஆணுடன் அரைகுறையாக நிற்பதை கண்ட வாலிபரும் அதிர்ச்சி அடைந்தார்.

அப்போது ஆட்டோ டிரைவருக்கும், அந்த வாலிபருக்கும் இடையே பெண்ணுடன் உல்லாசமாக இருப்பது தொடர்பாக வாய்த்தகராறு ஏற்பட்டது. தகராறு முற்றவே ஆத்திரம் அடைந்த ஆட்டோ டிரைவர், வாலிபரை கத்தியால் குத்தியதாக கூறப்படுகிறது. இதில் ரத்த வெள்ளத்தில் வாலிபர் கீழே சரிந்தார். அவரது அலறல் சத்தம் கேட்டு அக்கம் பக்கத்தில் உள்ளவர்கள் ஓடி வந்தனர். அதற்குள் ஆட்டோ டிரைவர் தப்பி ஓடி விட்டார். அக்கம் பக்கத்தினர் அந்த வாலிபரை மீட்டு ஆசாரிபள்ளம் அரசு ஆஸ்பத்திரியில் சேர்த்தனர். அங்கு வாலிபருக்கு தீவிர சிகிச்சை அளிக்கப்பட்டு வருகிறது. இதுபற்றி தகவல் அறிந்த ஆரல்வாய்மொழி போலீசார் சம்பவ இடத்துக்கு வந்து விசாரணை நடத்தினர்.

மேலும் பெண்ணுடன் உல்லாசமாக இருப்பதில் ஏற்பட்ட தகராறில் வாலிபருக்கு கத்திக்குத்து விழுந்த சம்பவம் ஆரல்வாய்மொழி பகுதியில் பெரும் பரபரப்பை ஏற்படுத்தியது.

இதுதொடர்பாக விசாரணை நடத்திய போலீசார், ஆட்டோ டிரைவரை தேடுகின்றனர். ஆட்டோ டிரைவர் தற்போது, நாகர்கோவிலில் உள்ள ஒரு இரும்புக்கடையில் தொழிலாளியாக வேலை பார்த்து வருகிறார் என்பது குறிப்பிடத்தக்கது.