கந்தர்வகோட்டையில் நவதானிய கடையின் பூட்டை உடைத்து ரூ.30 ஆயிரம் திருட்டு: மர்மநபர்களுக்கு போலீசார் வலைவீச்சு

கந்தர்வகோட்டை,

கந்தர்வகோட்டையில் உள்ள நவதானிய கடையின் பூட்டை உடைத்து ரூ.30 ஆயிரத்தை திருடி சென்ற மர்மநபர்களை போலீசார் வலைவீசி தேடி வருகின்றனர்.

புதுக்கோட்டை மாவட்டம், கந்தர்வகோட்டையை சேர்ந்தவர் பாலசுப்பிரமணியன். இவர் கந்தர்வகோட்டை காந்தி சிலை அருகே நவதானிய கடை நடத்தி வருகிறார். இந்தநிலையில் நேற்று முன்தினம் இரவு வியாபாரம் முடிந்து வழக்கம்போல கடையை அடைத்து விட்டு வீட்டிற்கு சென்று விட்டார். பின்னர் நேற்று காலை பாலசுப்பிரமணியன் கடைக்கு வந்தபோது கடையின் முன்பக்க பூட்டு உடைக்கப்பட்டு கிடப்பதை கண்டு அதிர்ச்சி அடைந்தார். பின்னர் உள்ளே சென்று பார்த்தபோது அவர் கல்லா பெட்டியில் வைத்திருந்த ரூ.30 ஆயிரத்தை மர்மநபர்கள் திருடி சென்றது தெரியவந்தது.

இதுகுறித்து கந்தர்வகோட்டை போலீசாருக்கு தகவல் தெரிவிக்கப்பட்டது. அதன்பேரில் சம்பவ இடத்திற்கு வந்த போலீசார் விசாரணை நடத்தி வருகின்றனர். பின்னர் இந்த திருட்டு குறித்து பாலசுப்பிரமணியன் கந்தர்வகோட்டை போலீஸ் நிலையத்தில் புகார் செய்தார். புகாரின்பேரில் போலீசார் வழக்குப்பதிவு செய்து நவதானிய கடையில் ரூ.30 ஆயிரத்தை திருடி சென்ற மர்மநபர்களை வலைவீசி தேடி வருகின்றனர்.