விருதுநகரில் சமுதாய கூடத்தை பயன்பாட்டிற்கு கொண்டு வர வேண்டும், நகராட்சி நிர்வாகத்துக்கு கோரிக்கை

விருதுநகர்,

விருதுநகர் நகர்மன்ற முன்னாள் துணைத்தலைவர் பாலகிருஷ்ணசாமி நகராட்சி கமி‌ஷனருக்கு அனுப்பி உள்ள மனுவில் கூறியிருப்பதாவது:–

விருதுநகர் நாராயணமடம் தெருவில் பல லட்சம் ரூபாய் செலவில் ஏழை, எளிய மக்கள் பயன்பாட்டிற்காக சமுதாய கூடம் கட்டப்பட்டு பயன்பாட்டில் இருந்து வந்தது. சில வருடங்களுக்கு முன்னர் நகராட்சியின் பின்புறம் உள்ள கட்டிடத்தை திட்டமிடல் இல்லாமல் நன்றாக இருந்த கட்டிடத்தை இடிப்பதற்காக அதில் இருந்த அலுவலக பொருட்களை சமுதாய கூடத்துக்கு மாற்றி விட்டனர்.

இது வரை நகராட்சி அலுவலகத்தில் இடிக்கப்பட்ட இடத்தில் புதிய கட்டிடம் கட்ட எவ்வித முயற்சியும் எடுக்கப்படவில்லை. இன்னும் எத்தனை ஆண்டுகள் ஆகும் என்றும் தெரியவில்லை. எனவே சமுதாயகூடத்தின் கீழ் பகுதியில் உள்ள பொருட்களை அதன் மேல்பகுதிக்கு மாற்றி பாதுகாப்பாக வைத்து பூட்டிவிட்டு கீழ் பகுதியை பொதுமக்கள் பயன்பாட்டிற்கு கொண்டு வர விரைந்து நடவடிக்கை எடுக்க வேண்டும். இவ்வாறு அந்த மனுவில் கூறப்பட்டுள்ளது.

மேலும் நெடுஞ்சாலைத்துறைக்கு அவர் அனுப்பி உள்ள மனுவில் கூறியிருப்பதாவது:–

விருதுநகர் நகராட்சி பகுதியில் நெடுஞ்சாலைத்துறையின் கட்டுப்பாட்டில் உள்ள கிருஷ்ணமாச்சாரியார் ரோடு மிகவும் சேதம் அடைந்துள்ளது. எம்.ஜி.ஆர்.சிலை அருகில் வாகனங்கள் செல்ல முடியாத அளவில் சேதம் அடைந்துள்ளது. சிவகாசி நான்கு வழிச்சாலையில் இருந்து விருதுநகருக்குள் வரும் சாலையும் மோசமான நிலையில் உள்ளது.

அருப்புக்கோட்டை ரோட்டில் மேம்பாலம் தொடங்கும் இடத்தில் மிகப்பெரிய பள்ளம் உள்ளது. அல்லம்பட்டி–ராமமூர்த்தி ரோடு சந்திப்பிலும், கம்மாபட்டி பகுதியிலும் மிகப்பெரிய பள்ளங்கள் உள்ளன. அரசு ஆஸ்பத்திரி முன்புள்ள சாலையும் மிக மோசமான நிலையில் உள்ளது. அல்லம்பட்டி சந்திப்பில் இருந்து அரசு ஆஸ்பத்திரி சந்திப்பு வரை உள்ள ராமமூர்த்தி சாலை மட்டும் அகலப்படுத்தப்படாமல் உள்ளது. இந்த சாலையை அகலப்படுத்தவும், மற்ற சாலைகளை சீரமைக்கவும் உடனடி நடவடிக்கை எடுக்க வேண்டும். இவ்வாறு அந்த மனுவில் கூறப்பட்டுள்ளது.