நடைபயிற்சி சென்ற பெண்ணிடம் 10 பவுன் நகை பறிப்பு

அம்பத்தூர்,

சென்னை திருமங்கலம் பாடிகுப்பம் காமராஜ் நகர் பகுதியை சேர்ந்தவர் மோகன் (வயது 64). ஓய்வு பெற்ற அரசு ஊழியர். இவருடைய மனைவி ஜெயா (60).

இவர் நேற்று காலை 6 மணியளவில், அதே பகுதியை சேர்ந்த 3 பெண்களுடன் பாடிகுப்பம் அண்ணாகுடியிருப்பு அருகில் நடை பயிற்சியில் ஈடுபட்டிருந்தார். அப்போது அந்த பகுதியில் 2 நபர்கள் மோட்டார்சைக்கிளுடன் நின்றுகொண்டிருந்தனர்.  அவர்கள் இருவரும் திடீரென ஜெயாவின் அருகே சென்று, அவர் கழுத்தில் அணிந்திருந்த 10 பவுன் கொண்ட 2 தங்க சங்கிலிகளை பறித்துக்கொண்டு மோட்டார் சைக்கிளில் ஏறி தப்பி சென்றனர். 

இது குறித்து திருமங்கலம் போலீஸ் நிலையத்தில் ஜெயா புகார் அளித்தார். அதன் பேரில் போலீசார் வழக்கு பதிவு செய்து விசாரித்து வருகின்றனர்.