‘வகுப்பறையில் ஆசிரியர்கள் செல்போன் பயன்படுத்தக்கூடாது’ மாவட்ட முதன்மை கல்வி அலுவலர் உத்தரவு

விழுப்புரம்

விழுப்புரம் கல்வி மாவட்டத்தில் உள்ள அரசு பள்ளிகள், அரசு உதவி பெறும் பள்ளிகள் என 133 பள்ளிகளின் தலைமை ஆசிரியர்களுக்கு வரும் கல்வி ஆண்டிற்கான ஆயத்த கூட்டம் நேற்று விழுப்புரம் அரசு மகளிர் மேல்நிலைப்பள்ளியில் நடந்தது.

கூட்டத்துக்கு மாவட்ட முதன்மை கல்வி அலுவலர் முனுசாமி தலைமை தாங்கி, தலைமை ஆசிரியர்களுக்கு பல்வேறு அறிவுரைகளை வழங்கினார். அப்போது அவர் கூறியதாவது:-

அரசு பள்ளிகளில் மாணவர்கள் சேர்க்கையை அதிகரிக்க செய்ய, அனைத்து பள்ளிகளிலும் விழிப்புணர்வு ஊர்வலம் நடத்த வேண்டும். பள்ளி வளாகங்கள் மற்றும் சுற்றுப்புறத்தை சுகாதாரமாக வைத்திருக்க வேண்டும். மாணவ- மாணவிகள் பயன்படுத்தும் கழிவறைகளும் சுகாதாரமாக இருக்க வேண்டும். பள்ளிகளின் சுற்றுச்சுவர்களில் இருக்கும் கட்சி விளம்பரங்கள், சுவரொட்டிகளை அகற்றிவிட்டு திருக்குறள் மற்றும் அரசின் இலவச திட்டங்கள் பற்றிய வாசகங்கள் இடம் பெற செய்ய வேண்டும்.

மாதந்தோறும் பெற்றோர் ஆசிரியர் கழக கூட்டத்தை நடத்தி, பள்ளியின் வளர்ச்சி மற்றும் மாணவர்களின் கல்வித்தரத்தை உயர்த்த பெற்றோர்களுக்கு தகுந்த ஆலோசனை வழங்க வேண்டும். 6-ம் வகுப்பு முதல் 9-ம் வகுப்பு வரையிலான ஆண்டு இறுதித்தேர்வு முடிவுகளை பரிசீலனை செய்து மாவட்ட கல்வி அலுவலரின் ஒப்புதல் பெற்று வருகிற 14-ந்தேதி (திங்கட்கிழமை) அனைத்து பள்ளிகளிலும் தேர்ச்சி முடிவுகளை வெளியிட வேண்டும்.

மேலும் மாணவர்கள், பள்ளிக்கு வரும்போது செல்போன் கொண்டு வரக்கூடாது, அதேபோல் மாணவிகளும் நகை உள்ளிட்ட அணிகலன்களை அணிந்து பள்ளிக்கு வரக்கூடாது. எக்காரணத்தை கொண்டும் வகுப்பறையில் ஆசிரியர்கள் செல்போன் பயன்படுத்தக்கூடாது. இதை ஒவ்வொரு தலைமை ஆசிரியர்களும் உறுதிப்படுத்திக்கொள்ள வேண்டும்.

கூட்டத்தில் மாவட்ட கல்வி அலுவலர் நீலாம்பாள், பள்ளி துணை ஆய்வாளர் இருதயராஜ், முதன்மை கல்வி அலுவலரின் நேர்முக உதவியாளர்கள் ராஜேந்திரன், காளிதாஸ் ஆகியோர் கலந்து கொண்டனர்.