3-வது மெட்ரோ ரெயில் வழித்தடத்தில் 2¼ கி.மீ. தூரத்துக்கு சுரங்கம் அமைப்பு

மும்பை, 

மும்பையில் அமையும் 3-வது மெட்ரோ ரெயில் வழித்தடத்தில் இதுவரை 2¼ கி.மீ. தூரத்துக்கு சுரங்கம் அமைக்கப்பட்டு உள்ளது.

மும்பையில் பெருகி வரும் போக்குவரத்து தேவையை கருத்தில் கொண்டு மோனோ, மெட்ரோ ரெயில் திட்டங்கள் செயல்படுத்தப்படுகின்றன. இதில் 3-வது மெட்ரோ ரெயில் திட்ட வழித்தடம் கொலபா-பாந்திராசீப்ஸ் வரை 33.5 கி.மீ. தூரத்திற்கு அமைக்கப்படுகிறது. இந்த வழித்தடம் சுரங்கமார்க்கமாக அமைக்கப்பட உள்ளது. இந்த வழித்தடத்தில் மொத்தம் 27 ரெயில் நிலையங்கள் அமைக்கப்பட உள்ளன.

இதில் 1 மெட்ரோ ரெயில் நிலையத்தை தவிர மற்ற 26 ரெயில் நிலையங்களும் பூமிக்கடியில் அமைய உள்ளன. இந்த திட்டத்திற்கான பணிகள் கடந்த ஆண்டு முதல் தொடங்கி நடந்து வருகிறது.

இதில், ஆசாத் மைதான், நயாநகர், மரோல் நாக்கா, வித்யாநகரி ஆகிய நான்கு இடங்களில் இருந்து சுரங்கம் தோண்டும் பணிகள் மேற்கொள்ளப்பட்டு வருகின்றன. இதில் 8 சுரங்கம் தோண்டும் எந்திரங்கள் பயன்படுத்தப்பட்டு வருகின்றன.

இதுவரையில், ஆசாத் மைதானத்தில் 450 மீட்டர், நயாநகரில் 1,005 மீட்டர், மரோல் நாக்காவில் 395 மீட்டர், வித்யாநகரியில் 342 மீட்டர் தூரத்துக்கும் என மொத்தம் 2 ஆயிரத்து 192 மீட்டர் தூரத்துக்கு (2¼ கி.மீ. தூரத்துக்கு சற்று குறைவு) சுரங்கம் அமைக்கப்பட்டு உள்ளதாக மும்பை மெட்ரோ ரெயில் கழக அதிகாரிகள் தெரிவித்து உள்ளனர்.