உத்தமபாளையம் அருகே லாரி மோதி 2 வயது குழந்தை பலி
உத்தமபாளையம் அருகே சாலையோரத்தில் சிறுவர்களுடன் விளையாடி கொண்டிருந்த குழந்தை மீது லாரி மோதியதில் பலியாகியது.
உத்தமபாளையம்,
உத்தமபாளையம் அருகே உள்ள க.புதுப்பட்டி வடக்கு காலனியை சேர்ந்தவர் முருகன். அவருடைய மகன் கனிஷ்குமார் (வயது 2). நேற்று காலை இவன், வீட்டருகே கம்பம்-உத்தமபாளையம் சாலையோரத்தில் சிறுவர்களுடன் விளையாடி கொண்டு இருந்தான். அப்போது உத்தமபாளையத்தில் இருந்து கம்பம் நோக்கி சென்ற லாரி எதிர்பாராதவிதமாக கனிஷ்குமார் மீது மோதியது.
இதில் படுகாயம் அடைந்த அவனை, அக்கம்பக்கத்தினர் மீட்டு சிகிச்சைக்காக உத்தமபாளையம் அரசு மருத்துவமனையில் சேர்த்தனர். அங்கு சிகிச்சை பலனின்றி கனிஷ்குமார் பரிதாபமாக இறந்தான்.
இதுகுறித்து உத்தமபாளையம் போலீசார் வழக்குப்பதிவு செய்து விசாரணை நடத்தி வருகின்றனர்.