நத்தத்தை சேர்ந்த கட்டிட தொழிலாளியை கரம்பிடித்த கம்போடியா நாட்டு பெண்

செந்துறை, 

திண்டுக்கல் மாவட்டம் நத்தம் அருகே பூசாரிபட்டியை சேர்ந்தவர் ஜெகநாதன். இவருடைய மகன் பார்த்திபன் (வயது 29), கட்டிட தொழிலாளி. இவர் கடந்த சில வருடங்களுக்கு முன்பு சிங்கப்பூரில் வேலை பார்த்து வந்தார். இவர் வேலை பார்த்த இடத்தின் அருகே ஒரு சூப்பர் மார்க்கெட்டில் கம்போடியா நாட்டை சேர்ந்த தென்மாவோ (30) என்ற பெண் வேலை பார்த்து வந்தார்.

பார்த்திபன் அடிக்கடி சூப்பர் மார்க்கெட்டுக்கு சென்று பொருட்கள் வாங்குவது வழக்கம். அப்போது இவர்கள் இரண்டு பேருக்கும் இடையே காதல் மலர்ந்தது. இவர்கள் 4 ஆண்டுகளாக காதலித்து வந்துள்ளனர். பின்னர் இருவரும் திருமணம் செய்து கொள்ள முடிவு செய்தனர். இதனையடுத்து பார்த்திபன் தனது சொந்த ஊரான நத்தம் அருகே உள்ள பூசாரிபட்டிக்கு தென்மாவோவை அழைத்து வந்தார்.

தனது காதல் குறித்து பார்த்திபன் பெற்றோரிடம் கூறியுள்ளார். ஆரம்பத்தில் அவரின் பெற்றோர் அந்த காதலை ஏற்க தயங்கினர். பின்னர் பார்த்திபன் அந்த பெண்ணைத்தான் திருமணம் செய்வேன் என்று பிடிவாதம் செய்ததன் அடிப்படையில் பெற்றோர் பச்சைக்கொடி காட்டினர். இதனையடுத்து தென்மாவோவின் பெற்றோரும் சம்மதம் தெரிவித்தனர். மேலும் இவர்களது திருமணத்தை பார்த்திபனின் சொந்த ஊரான பூசாரிபட்டியில் நடத்த முடிவு செய்தனர்.

இதைத்தொடர்ந்து தென்மாவோவின் பெற்றோர் மற்றும் உறவினர்களும் பூசாரிபட்டிக்கு வந்தனர். பின்னர் கிராம மக்கள் முன்னிலையில் பார்த்திபன்-தென்மாவோ திருமணம் நடந்தது. தங்களது கிராமத்துக்கு வந்த வெளிநாட்டு மருமகளை பூசாரிபட்டி கிராம மக்கள் ஆச்சரியத்துடன் பார்த்து மணமக்களை வாழ்த்தி சென்றனர்.