பராமரிப்பு பணி காரணமாக ரெயில்சேவை பாதிப்பு; பயணிகள் அவதி

அம்பர்நாத்,

மத்திய ரெயில்வேயின் மெயின் வழித்தடத்தில் உள்ள வித்தல்வாடி அருகே நேற்று ரெயில்வே பாலம் கட்டும் பணி நடந்தது. கல்யாண் - வித்தல்வாடி இடையே தண்டவாள சீரமைப்பு பணிகளும் நடந்தது. இதனால் கல்யாண் - கர்ஜத் இடையே நேற்று ரெயில்கள் இயக்கப்படவில்லை.

துறைமுக வழித்தடத்தில் குர்லா - வாஷி இடையே நேற்று காலை 11.10 மணி முதல் மாலை 4.10 மணி வரை பராமரிப்பு பணிகள் நடந்தது. இதனால் நேற்று காலை முதல் மாலை வரை சி.எஸ்.எம்.டி. - பன்வெல் இடையே மின்சார ரெயில்கள் இயக்கப்படவில்லை. இதேபோல மேற்கு ரெயில்வேயில் சாந்தாகுருஸ் - மாகிம் இடையே காலை 10.35 மணி முதல் பிற்பகல் 3.35 மணி வரை விரைவு வழித்தடத்தில் பராமரிப்பு பணிகள் நடந்தது. இதனால் அங்கும் சில ரெயில் சேவைகள் ரத்து செய்யப்பட்டன. ரெயில்கள் தாமதமாக இயக்கப்பட்டன. இதனால் பயணிகள் கடும் அவதி அடைந்தனர்.