சேவல் சண்டை நடத்திய 5 பேர் கைது

காட்பாடி,

காட்பாடி வண்டறந்தாங்கல் பகுதியில் உள்ள சுடுகாடு அருகே, அரசால் தடை செய்யப்பட்ட சேவல்சண்டை நடத்தப்படுவதாக காட்பாடி போலீஸ் இன்ஸ்பெக்டர் பழனிக்கு தகவல் கிடைத்தது. அதைத்தொடர்ந்து அவர் போலீசாருடன் அங்கு சென்றார். அப்போது போலீசார் வருவதை பார்த்ததும் சிலர் ஓடிவிட்டனர். 5 பேரை போலீசார் மடக்கி பிடித்தனர்.

போலீசார் விசாரணை நடத்தியதில் அவர்கள் பில்லாந்திப்பட்டு சந்தோஷ்(வயது 25), வண்டறந்தாங்கல் வினோத்குமார் (22), ஆரணி ரகுநாதபுரம் ஏகாந்தம் (33), சின்னஅல்லாபுரம் முனவர் (45), ஆற்காடு சேட்டு (34) என்பது தெரிந்தது. அவர்கள் 5 பேரையும் போலீசார் கைது செய்தனர்.

அவர்கள் பயன்படுத்திய 3 சேவல்கள், 8 மோட்டார்சைக்கிள்கள் ஆகியவற்றையும் போலீசார் பறிமுதல் செய்தனர்.