காஞ்சீபுரம் அருகே மோட்டார் சைக்கிள்கள் மோதல்; கட்டிட மேஸ்திரி பலி

காஞ்சீபுரம், 

காஞ்சீபுரத்தை அடுத்த சீமாளம் அருந்ததிபாளையம் கிராமத்தை சேர்ந்தவர் முனுசாமி. இவரது மகன் குமார் (வயது 37). கட்டிட மேஸ்திரி. இவர் கட்டிட வேலை செய்யும் அதே பகுதியை சேர்ந்த அமுதாவை தனது மோட்டார் சைக்கிளில் அழைத்து கொண்டு விஷாரில் இருந்து காஞ்சீபுரம் நோக்கி வந்து கொண்டிருந்தார். கீழ்கதிர்பூர் அருகே வந்து கொண்டிருந்தபோது கீழம்பி கிராமத்தில் இருந்து வந்த மோகன் (38) என்பவரது மோட்டார் சைக்கிள் மீது இவரது மோட்டார் சைக்கிள் மோதியது.

சாவு

இதில் குமார் அதே இடத்தில் ரத்த வெள்ளத்தில் துடி துடித்து உயிரிழந்தார். அமுதா, மோகன் ஆகியோர் படுகாயம் அடைந்தனர். அவர்கள் சிகிச்சைக்காக காஞ்சீபுரம் அரசு ஆஸ்பத்திரியில் அனுமதிக்கப்பட்டுள்ளனர்.

இது குறித்து தகவல் கிடைத்ததும் பாலுச்செட்டிசத்திரம் போலீஸ் இன்ஸ்பெக்டர் பிரபாகர் சம்பவ இடத்திற்கு விரைந்து வந்து குமாரின் உடலை கைப்பற்றி காஞ்சீபுரம் அரசு ஆஸ்பத்திரிக்கு அனுப்பி வைத்தார். மேலும் வழக்குப்பதிவு செய்து விசாரணை நடத்தி வருகிறார்.