பஸ் கட்டண உயர்வை திரும்ப பெறக்கோரி கள்ளக்குறிச்சி அரசு கல்லூரி மாணவர்கள் போராட்டம்

கள்ளக்குறிச்சி,

தமிழகத்தில் உயர்த்தப்பட்ட பஸ் கட்டணத்தை திரும்ப பெறக்கோரி பல்வேறு அரசியல் கட்சியினர் மற்றும் பள்ளி, கல்லூரி மாணவர்கள் ஆர்ப்பாட்டம், சாலை மறியல் போன்ற போராட்டங்களில் ஈடுபட்டு வருகின்றனர்.

அந்த வகையில், நேற்று கள்ளக்குறிச்சி அரசு கலை மற்றும் அறிவியல் கல்லூரியில் படிக்கும் மாணவ–மாணவிகள் வகுப்புகளை புறக்கணித்து விட்டு, கல்லூரி நுழைவு வாயில் முன்பு திரண்டனர். பின்னர் அவர்கள் உயர்த்தப்பட்ட பஸ் கட்டணத்தை தமிழக அரசு உடனடியாக திரும்ப பெறக்கோரி கண்டன கோ‌ஷங்கள் எழுப்பியபடி தர்ணா போராட்டத்தில் ஈடுபட்டனர். இதுபற்றி தகவல் அறிந்த கள்ளக்குறிச்சி போலீசார் மற்றும் கல்லூரி நிர்வாகத்தினர் சம்பவ இடத்துக்கு விரைந்து வந்து, போராட்டத்தில் ஈடுபட்ட மாணவர்களை சமாதானம் செய்து, வகுப்பறைகளுக்கு அனுப்பி வைத்தனர். இந்த சம்பவத்தால் அங்கு சிறிது நேரம் பரபரப்பு ஏற்பட்டது.