டி.டி.வி.தினகரனுக்கு எதிராக ஆர்ப்பாட்டம்: கமல் ரசிகர்கள் 53 பேர் கைது

மதுரை,

சென்னை ஆர்.கே.நகர் இடைத்தேர்தலில் டி.டி.வி. தினகரன் வெற்றி பெற்றது தொடர்பாக நடிகர் கமல்ஹாசன் கருத்து தெரிவித்திருந்தார். இதற்கு எதிர்ப்பு தெரிவித்து தினகரன் ஆதரவாளர்கள், கமலை கண்டித்து பல்வேறு இடங்களில் போராட்டங்கள் நடத்தினர். மேலும் அவர் மீது நடவடிக்கை எடுக்க வலியுறுத்தி போலீசில் புகாரும் அளித்தனர்.

இந்தநிலையில் தினகரனை கண்டித்து கமல் ரசிகர்கள் மதுரை பெரியார் பஸ் நிலையம் அருகே ஆர்ப்பாட்டத்தில் ஈடுபட்டனர். அப்போது அவர்கள், தினகரனை கண்டித்து கோ‌ஷம் எழுப்பினர். அப்போது அங்கு வந்த போலீசார், கமல் ரசிகர்களை அங்கிருந்து கலைந்து செல்லுமாறு கூறினர். அவர்கள் கலைந்து செல்ல மறுத்ததால் ஆர்ப்பாட்டம் நடத்திய கமல் ரசிகர்கள் 53 பேரை போலீசார் கைது செய்தனர்.