தொடருக்காக படமாக்கப்பட்ட நடிகையின் கவர்ச்சி வீடியோ ஆபாச வலைதளத்தில் வெளியானது

மும்பை,

தொடருக்காக படமாக்கப்பட்ட நடிகையின் கவர்ச்சி வீடியோ ஆபாச வலைதளத்தில் வெளியானது தொடர்பாக இயக்குனர் கைது செய்யப்பட்டார்.

மும்பை அந்தேரி லோகண்ட்வாலா பகுதியை சேர்ந்த 26 வயது நடிகை ஒருவருக்கு சினிமா இயக்குனர்களான உபேந்திர ராய், ரஞ்சன் அகர்வால் (வயது46) ஆகியோரின் அறிமுகம் கிடைத்தது. அவர்கள் நடிகைக்கு வலைதளத்தில் ஒளிபரப்பாகும் தொடரில் நடிக்க வாய்ப்பு வழங்கினார்கள். இந்த தொடருக்காக அந்த நடிகையை வைத்து கவர்ச்சியாக படம் பிடிக்கப்பட்டு உள்ளது.

அந்த கவர்ச்சி வீடியோ தொடருக்கு மட்டும் பயன்படுத்தப்படும் என்று இருவரும் நடிகையிடம் கூறியிருந்தனர்.

ஆனால் அந்த தொடர் வலைதளத்தில் வெளியாவதற்கு முன்னரே, நடிகையின் கவர்ச்சி படம் ஆபாச வலைதளத்தில் வெளியாகி உள்ளது.

இது நடிகையின் தோழி ஒருவர் மூலம் அவருக்கு தெரியவந்தது. இதனால் அதிர்ச்சி அடைந்த நடிகை ஒஷிவாரா போலீஸ் நிலையத்தில் புகார் கொடுத்தார். அதன்பேரில் போலீசார் இயக்குனர்கள் இருவர் மீதும் வழக்குப்பதிவு செய்தனர். இதுபற்றி அறிந்த இருவரும் தலைமறைவாகி விட்டனர்.

இந்த நிலையில், இயக்குனர் ரஞ்சன் அகர்வால் போலீசாரிடம் சிக்கினார். போலீசார் அவரை அதிரடியாக கைது செய்தனர். பின்னர் அவர் கோர்ட்டில் ஆஜர்படுத்தப்பட்டு போலீஸ் காவலில் ஒப்படைக்கப்பட்டனர். தலைமறைவாக உள்ள இயக்குனர் உபேந்திர ராயை போலீசார் வலைவீசி தேடி வருகின்றனர்.