வசாயில் பயங்கரம் கழுத்தை அறுத்து ஆட்டோ டிரைவர் படுகொலை

வசாய்,

வசாயில், கழுத்தை அறுத்து ஆட்டோ டிரைவர் படுகொலை செய்யப்பட்டார். இந்த பயங்கர சம்பவம் குறித்த விவரம் வருமாறு:-

ஆட்டோ டிரைவர்

பால்கர் மாவட்டம் வசாய் நய்காவ் பகுதியை சேர்ந்தவர் விநாயக் ஹரிசந்திர போயர்(வயது52). ஆட்டோ டிரைவர். இவருக்கும், அந்த பகுதியில் வசித்து வரும் உறவினர்கள் சிலருக்கும் இடையே முன்விரோதம் இருந்து வந்ததாக கூறப்படுகிறது.

இந்தநிலையில், நேற்று வெளியில் சென்ற விநாயக் ஹரிசந்திர போயர் வெகுநேரமாகியும் வீடு திரும்பவில்லை. இதனால் கலக்கம் அடைந்த குடும்பத்தினர் தேடி பார்த்தபோது, வீட்டின் அருகே உள்ள ஒரு இடத்தில் விநாயக் ஹரிசந்திர போயர் கழுத்து அறுக்கப்பட்ட நிலையில் ரத்த வெள்ளத்தில் பிணமாக கிடந்தார்.

கொலை

இதைப்பார்த்து குடும்பத்தினர் அதிர்ச்சியில் உறைந்தனர். அவரது உடலை பார்த்து கதறி அழுதனர். அவரை மர்மஆசாமிகள் கழுத்தை அறுத்து கொலை செய்துவிட்டு தப்பிச்சென்றுள்ளது தெரியவந்தது. இந்த சம்பவம் குறித்து போலீசுக்கு தகவல் தெரிவிக்கப்பட்டது.

போலீசார் சம்பவ இடத்திற்கு விரைந்து வந்து விநாயக் ஹரிசந்திர போயரின் உடலை கைப்பற்றி பிரேத பரிசோதனைக்காக அங்குள்ள அரசு ஆஸ்பத்திரிக்கு அனுப்பி வைத்தனர். மேலும் சம்பவம் குறித்து வழக்குப்பதிவு செய்து, உறவினர்களுடன் ஏற்பட்ட முன்விரோதத்தில் அவர் கொலை செய்யப்பட்டாரா? அல்லது வேறு யாராவது அவரை கொன்றனரா? என்பது உள்பட பல்வேறு கோணங்களில் தீவிர விசாரணை நடத்தி வருகின்றனர்.