பெண்ணை மானபங்கம் செய்ததாக புகார்: பாடகர் யாஷ் வடாலி கைது

மும்பை,

பெண்ணை மானபங்கம் செய்ததாக பாடகர் யாஷ் வடாலி கைது செய்யப்பட்டுள்ளார்.

மும்பை கோரேகாவ் மேற்கில் பாடகர் யாஷ் வடாலியின் நண்பர் ஒருவரது பிறந்தநாள் விழா கடந்த சில நாட்களுக்கு முன் நடந்தது. இந்த விழாவில் யாஷ் வடாலியும் கலந்து கொண்டிருந்தார். இந்த நிகழ்ச்சியின் போது 39 வயது பெண் ஒருவர் குறிப்பிட்ட பாடலை போடும்படி கூறினார். பாடகர் யாஷ் வடாலி வேறு பாடலை இசைக்க வேண்டும் என கூறினார்.

இதனால் அவருக்கும், 39 வயது பெண்ணிற்கும் இடையே வாக்குவாதம் ஏற்பட்டது. இதில் ஆத்திரமடைந்த பாடகர் 39 வயது பெண்ணின் சட்டை காலரை பிடித்து, உடலை தொட்டு மானபங்கம் செய்ததாக கூறப்படுகிறது.

இதனால் அதிர்ச்சி அடைந்த அந்த பெண் சம்பவம் குறித்து பங்குர் நகர் போலீசில் புகார் கொடுத்தார். அதன்பேரில் போலீசார் யாஷ் வடாலி மீது வழக்குப்பதிவு செய்து விசாரணை நடத்தி வந்தனர். இதற்கிடையே நேற்று முன்தினம் பாடகர் யாஷ் வடாலி முன்ஜாமீன் கேட்டு தின்தோஷி செசன்ஸ் கோர்ட்டில் மனு தாக்கல் செய்து இருந்தார்.

இந்தநிலையில் நேற்று முன்தினம் அவரை போலீசார் அதிரடியாக கைது செய்தனர்.